Загреб-2025: «Дьулурҕан» куонкурсун кыайыылааҕа быһаарылынна

Көҥүл тустууга аан дойду чемпионатыгар анаан спорду таптааччыларга туһаайан тэрийбит, үгэс быһыытынан ыытар куонкуруспут түмүктэннэ. Быйылгы, Олимпиада-2024 кэннинээҕи саҥа олимпийскай циклы аһар аан дойду чемпионата элбэх соһуччу түмүктэрдээх буолла. Саҥа ааттар күөрэйэн таҕыстылар.

Биһиги куонкуруспутугар бары даҕаны тустууну сыныйан көрөр, ырытар, бэйэлэрэ туспа санаалаах, сыанабыллаах эрэ дьон кытталлар. Үксүлэрэ кэриэтэ маннык куонкурустарга бастыы сылдьыбыт дьон.

Куонкуруспут үс ыйытыыттан турбута: 1. Ыйааһыннарга чемпионнарынан кимнээх буолуохтарай? (Сөптөөх хоруй иһин 1 очукуо); 2. Россия бөҕөстөрүттэн мэтээлгэ кимнээх тиксиэхтэрэй? (2 очукуо); 3. Сахалартан кимнээх, ханнык мэтээли ылыахтарай? (3 очукуо).

Дьэ, киирбит сылыктааһыннары ырытан баран бастыҥнары быһаардыбыт.

Бэҕэһээҥҥэ диэри 7-лии очукуону ылан бастаан испит Айсен Молуков, Стас С., Евгений Огоюкин бүтэһик финаллар түмүктэринэн, 65 киилэҕэ чемпионнаабыт иранец Амузадхалилины сөпкө билгэлээн, эбии 1-дии очукуону суруннулар. Онон үһүөн 8-тыы очукуоланнылар. Манна балаһыанньа быһыытынан, кыайыылаах биир буоларын инниттэн, тэҥнэһии түгэнигэр ким бэйэтин сылыктааһынын урут ыыппыт – ол бастыыр диэн этэ. Онон Айсен Молуков – «Дьулурҕан» хаһыат, көҥүл тустууга аан дойду 2025 сыллааҕы чемпионатыгар анаммыт куонкуруһугар кыайыылааҕынан буолла. Стас иккис, Евгений үһүс буоллулар.

Манна даҕатан эттэххэ, куонкуруска кыттыбыт 35 киһиттэн 33-һэ – 97 киилэҕэ Ахмед Тажудинов чемпионнуур диэбиттэрэ туолбата. Арай, Ванесса – Кайл Снайдеры, Михаил Максимов – Магомед Курбановы ылбыт этилэр. Ванесса маладьыас! Аояги, Заре, Халили, Снайдер чемпионнуохтара диэн сөпкө сылыктаата. Манна сыһыары тутан эттэххэ, Егор Капитонов биэс чемпиону (Угуев, Валенсия, Хидли, Заре, Халили) таайан, куонкурус бастакы ыйытыгар ордук көрдөрүүну ситистэ.

Куонкурус түмүгэ:

Айсен Молуков, Стас С., Евгений Огоюкин – 8-тыы очукуо

Егор Капитонов, Сергей Лукин – 7

Андрей Александров, Иван Кычкин – 6.

Кыайыылаах Айсен Молуковы өссө төгүл эҕэрдэлиибит! Киниэхэ бирииһэ бу күннэргэ туттарыллыа. Санатан эттэххэ, куонкуруска бирииһи Роман Иванович Оконешников салайааччылаах Саха Республикатын физическэй култуураҕа уонна маассабай спорка управлениета туруорда.

“Дьулурҕан” куонкурса дьэҥкир, аһаҕас. Хас биирдии кыттааччы уонна атыттар даҕаны, куонкурус усулуобуйатын итиэннэ ким хайдах сабаҕалаабытын барытын сайтка киирэн https://dzulurgan.ru/2025/09/bolҕojuҥ-kuonkurus-kyajyylaahtary-taajyҥ-4 билгэлээһиннэри көрүөн, сыаналыан, ырытыан уонна сыыһа быһаарыы тахсаары гыннаҕына көннөрүөн да сөп.

Куонкуруска кыттыбыт дьоҥҥо барыларыгар барҕа махтал! Өссө даҕаны «Дьулурҕан» ыытар тэрээһиннэригэр көхтөөхтүк кыттаргытыгар баҕарабыт.

Куонкурус түмүгүн ааҕыыга кимҥэ туох ыйытыы үөскээбитин уонна санааларгытын бу суруйуу анныгар баар Комментарийга суруйаргытыгар.

Петр ПАВЛОВ.