Загреб-2025: Бүгүҥҥүттэн тустуу!

Дьэ, тустуубут күнэ үүннэ! Биһиги бары болҕомтобут, бастатан туран – бэйэбит бөҕөстөрбүтүгэр. Биллэрин курдук, аан дойду быйылгы чемпионатыгар биэс бөҕөспүт кыттар.

Ол курдук, Загреб көбүөрүгэр – Арыйаан Тютрин (Беларусь, 57 кг), Айаал Белолюбскай (Таджикистан, 57 кг), Владимир Егоров (Хотугу Македония, 57 кг), Георгий Окороков (Австралия, 61 кг), Виктор Рассадин (Таджикистан, 70 кг) тахсыахтара.

Бүгүн чемпионакка – 61, 70, 86, 125 киилэлээхтэр күрэхтэһиини маҥнайгынан саҕалыыллар. Оттон 57 кг ыйааһыннаахтар сарсын тусталлар.

61 киилэҕэ – 26 бөҕөс сэрэбиэйгэ киирбит. Георгий Окороков үөһэ бөлөххө баар. Кини бастакы утарсааччыта 22 саастаах Бесир Алили (Хотугу Македония). Бу бөҕөһү кытта Владимир Егоров хаста даҕаны тустан турар. Онон кинини кытта хайдах тустары, биир дойдулааҕар Окороковка сүбэлээбитэ буолуо диэн эрэнэн кэбиһиэҕиҥ.

Онно кыайдаҕына уолбут аныгыскы эргиигэ казах Есенгелди уонна швейцарец Лейтер пааратын кыайыылааҕын кытта киирсиэҕэ.

Бу бөлөххө өссө Угуев (Россия), Удит (Индия), Жумашбек (Кыргызстан), Форрест (АХШ), Суда (Япония) курдук күүстээх бөҕөстөр бааллар. Атыттар туох дии саныыллара буолла? Оттон мин санаабар, бу ыйааһыҥҥа күүстээхтэр бары бастакы бөлөххө түбэспиттэр.

70 кг ыйааһыҥҥа 29 кыттааччы күөн көрсүө. Виктор Рассадин – Европа чемпиона, аан дойду чемпионатын призера Арман Андреасяны (Армения) кытта тустуоҕа. Бу опыттаах, күүс-уох өттүнэн сүрдээх сайдыылаах бөҕөс. Рассадин манна кыайдаҕына, серб Войнович – Карем (Ирак) тустуутун кыайыылааҕар тахсыаҕа. Салгыы эргиирдэргэ бу бөлөххө өссө иранец Яздани, кыргыз Акматалиев, дьоппуон Оаяги киирсиэхтэрин сөп.

Виктор Рассадин бүгүн С көбүөргэ бастакы пааранан тахсар. Оттон – Окороков В көбүөргэ – сэттиһинэн. Уолаттарбытыгар ыалдьабыт! Барыта бэйэлэриттэн тутулуктаах. Бу күҥҥэ, бу чааска бэлэмнэрэ, тус туруктара, кыайыыга дьулуурдара билиэҕэ.

Чемпионат хапсыһыылара Дьокуускай бириэмэтинэн киэһэ 17:30 чаастан саҕаланаллар. Быһа биэриини IRON сахалыы кэпсээн-ипсээн көрдөрүөҕэ. Күрэхтэһии хаамыытын уонна чемпионат атын да сонуннарын «Дьулурҕан» хаһыат dzulurgan.ru сайтыгар уонна телеграмҥа t.me/dzulurgan каналыгар көрүөххүтүн сөп. Бу улахан таһымнаах түһүлгэни сырдатыы өссө нэдиэлэ анараа өттүттэн саҕаламмыта.

Петр ПАВЛОВ.