Загреб-2025: Үс киһи чорбос гынна

Син эмиэ Хорватияҕа ыытылла турар көҥүл тустууга аан дойду чемпионатын көбүөрүгэр курдук, «Дьулурҕан» тэрийбит куонкурсугар тыҥааһыннаах киирсиилэр буола тураллар. Бу даҕаны түгэн көрдөрөр, Саха сиригэр хайдах курдук тустууну таптыылларын, тустууну билэллэрин.

Дьэ, бөөлүүҥҥү финаллар кэннилэриттэн куонкуруска киирбит хоруйдары ырытан көрүөххэ. Билэргит курдук, 57 кг – Хан Сон Чол (КНДР), 74 кг – Кота Такахаши (Япония), 79 кг – Георгеос Кугумцидис (Греция), 92 кг – Трент Хидли (АХШ) кыайыы өрөгөйүн биллилэр.

Онуоха 57 киилэҕэ ити кореец бастыа диэн Герман Шкулев, Василий Алексеев, Анастасия Алексеева уот харахха сылыктаабыттар. Дьоппуон Такахашины бастыа диэн Федора Захарова бэркэ билгэлээбит. Оттон 92 кг Хидли бастыырын Тимофей, Николай Терентьев, Евгений Огоюкин, Егор Капитонов, Николай Черкашин сөпкө таайбыттар. Ол оннугар 79 киилэҕэ чемпионнаабыт грек уолун ким даҕаны ааттаабатах. Хомойуох иһин, куонкурус үһүс ыйытыгар — сахалартан ким миэстэлэһиэй диэҥҥэ биһиги бөҕөстөрбүт эрэли толорботулар. Онон ким даҕаны очукуо суруммата

Онон, билиҥҥитэ барыллаан ааҕыынан Айсен Молуков, Стас, Евгений Огоюкин 7-лии очукуону хомуйан чорбос гыннылар. Кинилэргэ биир очукуонан хаалан – Артур Дыдырысов, Андрей Александров, Егор Капитонов, Сергей Лукин, Иван Кычкин тилэх уопсан иһэллэр.

Ким кыайарын бүгүҥҥү түүҥҥү – 65 уонна 97 кг ыйааһыннар быһаарыахтара.

Санатан эттэххэ, куонкуруска бирииһи Роман Иванович Оконешников салайааччылаах Саха Республикатын физическэй култуураҕа уонна маассабай спорка управлениета туруорда.

“Дьулурҕан” куонкурса дьэҥкир, аһаҕас. Хас биирдии кыттааччы уонна атыттар даҕаны, куонкурус усулуобуйатын итиэннэ ким хайдах сабаҕалаабытын барытын сайтка киирэн https://dzulurgan.ru/2025/09/bolҕojuҥ-kuonkurus-kyajyylaahtary-taajyҥ-4 билгэлээһиннэри көрүөн, сыаналыан, ырытыан уонна сыыһа быһаарыы тахсаары гыннаҕына көннөрүөн да сөп.

Петр ПАВЛОВ.