Владимир Егоров салгыы тустар

Хорватия Загреб куоратыгар үгэннээн ыытылла туррар көҥүл тустууга аан дойду чемпионатын сырдатыыны салгыыбыт. Чемпионат иккис күнүгэр биһигиттэн 57 киилэҕэ киирсэр үс уолбут: Арыйаан Тютрин (Беларусь), Владимир Егоров (Хотугу Македония), Айаал Белолюбскай (Таджикистан) туһуннулар.

Хапсыһыылар иннилэринэ, Олимпиада-2024 призера, Азия чемпиона индус Аман Сехрават ыйааһыннаныыга кэлбэтэ, онон күрэхтэһииттэн туоруур диэн сонун кэлбитэ. Онон биһиги Владимир Егоровпыт бастакы эргииргэ быһа кыайыыланна. Кини финал 8/1-гэр Ирак пехлевана Хуссейны киирээт умса көтөн баран хаста даҕаны «накат» диэн албаска эргитэн, хапсыһыыны болдьо5ун иннинэ очукуонан (10:0) ыраас кыайыыны ситистэ. Салгыы, финал чиэппэригэр Владимир аны бэйэтэ, эдэрдэргэ Азия чемпиона, аан дойду призера кыргыз Бекзад Алмаз Уулуга иккис түһүмэххэ киирэн улаханнык (5:16) хотторон кэбистэ.

Бу ыйааһыҥҥа барыллааһын тустууларын кэннилэриттэн кыһыл көмүс мэтээл иһин Хан Чон Сонг (КНДР) уонна Бекзад Алмаз Уулу (Кыргызстан) тустар буоллулар.

Маннык түгэҥҥэ Владимир Егоров салгыы тустар. Кини бүгүн санааны уоскутар бөлөххө, Саундерс (Канада) – Сакамото (Япония) киирсиилэрин кыайыылааҕын кытта тустуоҕа.

Оттон Айаал Белолюбскай – Россия чемпиона Муса Мехтихановка төҕө даҕаны 3:7 ахсаанынан хоттордор, куһаҕана суох тустууну көрдөрдө. Мехтиханов салгыы күрэхтэһиигэ Олимпиада-2024 призера узбек Г.Абдуллаевка хотторон туораата. Онон биһиги бөҕөспүт күрэхтэһииттэн туоруурга күһэлиннэ.

Быйыл Европа чемпионатыгар үһүс бириистээх миэстэҕэ тахсыбыт улахан үөрүйэхтээх, 30 саастаах Арыйаан Тютриҥҥа эрэл баара. Ол эрээри, бөҕөспүт бастакы эргииргэ казах Адилет Алмухамедовы төҕө даҕаны 6:3 ахсаанынан кыайдар, атаҕар эчэйии ылан, кыаҕын ситэ туһаммата. Салгыы эргииргэ Арыйаан – Гуламжон Абдуллаевка (Узбекистан) 1:4 ахсаанынан сабырыйтаран кэбистэ. Манна кини ситэри кыаҕынан тустуоҕун, эчэйиитэ мэһэйдээтэ диэн сыаналыахха сөп. Абдуллаев аны финалга тахсар иһин киирсиигэ кыргыз Алмаз Уулуга хотторон, биһиги бөҕөспүт салгыы суолун бүөлээн кэбистэ.

Дьэ, онон бүгүн Владимир Егоровы эрэнэ кэтэһэбит.

Бүгүҥҥү финалга таҕыстылар:

57 кг Хан Чон Сонг (КНДР) – Бекзат Алмаз Уулу (Кыргызстан)

74 кг Чермен Валиев (Албания) – Кота Такахаши (Япония)

79 кг Георгеос Кугумсидис (Греция) – Леви Хейнс (АХШ)

92 кг Трент Хидлей (АХШ) – Аманула Гаджимурадов (Россия).

Чемпионат хапсыһыылара Дьокуускай бириэмэтинэн киэһэ 17:30 чаастан саҕаланаллар. Быһа биэриини IRON сахалыы кэпсээн-ипсээн көрдөрүөҕэ. Күрэхтэһии хаамыытын уонна чемпионат атын да сонуннарын «Дьулурҕан» хаһыат dzulurgan.ru сайтыгар уонна телеграмҥа t.me/dzulurgan каналыгар тутатына көрүөххүтүн-билиэххитин сөп.

Петр ПАВЛОВ.