Владимир Егоров бэһис буолла

Хорватия киин куоратыгар көҥүл тустууга аан дойду чемпионата үгэннээн ыытылла турар. Билэргит курдук, бу улахан таһымнаах күрэхтэһиигэ саха тустууга кыһатын биэс иитиллээччитэ кытынна.

Кинилэртэн арыый ордук көрдөрүүнү Европа экс-чемпиона Владимир Егоров ситистэ. Кини бу күрэхтэһиигэ кыттыыта хара маҥнайгыттан табыллыбыта. Олимпиада-2024 призера Аман Сехрават (Индия) сэрэбиэйи ааһан баран, ыйааһыннаныыга кэлбэккэ, биһиги бөҕөспүт быһа кыайыыны суруммута.

Салгыы күрэхтэһиигэ кини Ирак бөҕөһүн очукуонан ыраастык хоппута. Оттон эдэрдэргэ Азия күрэхтэһиитин кыайыылааҕа, аан дойду призера кыргыз Бекзат Алмаз Ууга хотторон кэбиспитэ. Бу бөҕөс атын утарсааччыларын кыайталаан, бастакы миэстэ иһин тахсар буолбутунан, Егоровка салгыы тустар кыах бэриллибитэ.

Ол курдук, финалга тахсыбыт бөҕөстөргө хотторбуттар – “санааны уоскутар” диэн ааттаах бөлөхтөрүгэр киирэн канадец Саундерсы охторон түһэрэн баран, син эмиэ били Ирак бөҕөһүн кыайбытын курдук, «накат» диэн албаска хаста эмэтэ эргитэн, очукуонан ыраастык хотто. Онон, үһүс бириистээх миэстэ иһин кыттар кыахтаммыта.

Боруонса мэтээл иһин Олимпиада призера узбек Гуламжон Абдуллаевтыын тустуутугар Владимир аһара сэрэхтээхтик, кэтэнэн туһунна. Ыгыллан хаалан, тугу да сатаан оҥорбото. Онон 1:3 ахсаанынан хотторон кэбистэ.

57 киилэҕэ түмүк маннык буолла: 1. Хан Чон Сон (КНДР), 2. Бекзат Алмаз Уулу (Кыргызстан), 3. Арсен Арутюнян (Армения), Гуламжон Абдуллаев (Узбекистан).

Дьэ, онон бу чемпионакка бөҕөстөрбүт кыттыылара мөлтөх буолла. Онуоха бу түгэни аһардан кэбиспэккэ – кэмигэр сөптөөх ырытыы, тустууга сыһыаны уларытыы, бэйэҕэ ирдэбиллээх сыһыан, ситимнээх үлэ эрэйиллэр. Оччоҕо эрэ тустуубут өнүйүөҕэ.

Чемпионат хапсыһыылара Дьокуускай бириэмэтинэн киэһэ 17:30 чаастан саҕаланаллар. Быһа биэриини IRON сахалыы кэпсээн-ипсээн көрдөрүөҕэ. Күрэхтэһии хаамыытын уонна чемпионат атын да сонуннарын «Дьулурҕан» хаһыат dzulurgan.ru сайтыгар уонна телеграмҥа t.me/dzulurgan каналыгар тутатына көрүөххүтүн-билиэххитин сөп.

Петр ПАВЛОВ.