Спартакиада түһүмэхтэрэ чэпчэки атлетикаттан саҕаланна

Нам сэлиэнньэтигэр сайыҥҥы уһун сынньалаҥ кэнниттэн тэрилтэлэр икки ардыларыгар комплекснай спартакиада суотугар киирэр күрэхтэһиилэр түһүмэхтэрэ саҕаланнылар. Ол курдук, күһүҥҥү сылаас күн турбутугар барыта 13 хамаанда чэпчэки атлетикаҕа күрэхтэстэ.

Александр Игнатьев аатынан стадиоҥҥа балаҕан ыйын 10 күнүгэр 8 улахан уонна 5 дьоҕус тэрилтэ чэпчэки атлетикаҕа эстафета түһүмэҕэр көрүстэ. Алта киһилээх хамаандалар 100 м дистанцияҕа “шведскай” эстафетаҕа сүүрдүлэр.

Күрэхтэһиигэ сэлиэнньэ тэрилтэлэрэ бастыыр эрэ иһин буолбакка, сибиэһэй салгыҥҥа эти-сиини чэбдигирдэ кыттыыны ылбыттарын киһи хайгыыр, астына көрөр. Саамай сүрүнэ, киһи күннээҕи үлэ чааһын кэнниттэн күрэхтэһииттэн сэргэхсийэн, үөрэн-көтөн, дуоһуйууну ылан барыахтаах.

Дьоҕус тэрилтэлэргэ туох да мөккүөрэ суох кыһыл көмүс мэтээллэри уонна кубогы Ньургун Тимофеев аатынан өрөспүүбүлүкэтээҕи Олимпийскай эрэл спортивнай оскуолата ылла. Иккис үрдэлгэ “Солнышко” уһуйаан тахсан турунна уонна үһүс миэстэни Намнааҕы ойуур хаһаайыстыбатын тэрилтэтэ дабайда. Бириистээх миэстэлэргэ бэрт кыранан хапсыбакка “Кыталык” уһуйаан уонна Социальнай фонд тэрилтэлэрэ буоллулар.

Улахан тэрилтэлэргэ кыһыл көмүс мэтээллэри Илья Винокуров аатынан Намнааҕы педагогическай колледж аатын чиэһин көмүскээбит 3 кыыс уонна 3 эр киһи кэттилэр уонна кубогынан наҕараадаланнылар. Үрүҥ көмүс мэтээллэри, кубогы ИДьМ үлэһиттэрэ ыллылар. Үһүс миэстэҕэ улуустааҕы дьаһалта хамаандата тахсан, боруонса мэтээллэринэн уонна кубогынан наҕараадаланна. Салгыы, Намнааҕы “Сахатранснефтегаз” (4-с миэстэ), Намнааҕы 2-с нүөмэрдээх оскуола (5-с миэстэ), “Сулусчаан” уһуйаан (6-с миэстэ), улуустааҕы үөрэх управлениета (7-с миэстэ), Намнааҕы 3-с нүөмэрдээх оскуола (8-с миэстэ) эстафетаны түмүктээбиттэрэ.

Бэлиэтээн эттэххэ, сүүрбүт бары хамаандалар бириэмэлэрэ утуу-субуу тэҥ соҕус буолара бигэргэнэр. Бу курдук, нэһилиэнньэ ахсаана спорка сыстыыта үксүү турдун, элбэх киһи спорду таптаатын, спорду доҕор оҥоһуннун!

ХАРЫСХАН.

Нам улууһа.