Сэдэх экспонаттары көрөн сэргэҕэлээн

«Куоркуннуу олоруохха, Куоркуннуу айыахха!» диэн ааттаах 2018 сылтан ыытыллар быыстапкаҕа, Саха АССР үтүөлээх тренерэ, Россия физическэй култуураҕа үтүөлээх үлэһитэ, Чурапчы улууһун бочуоттаах олохтооҕо Постников Константин Сергеевич оҕолоро сыллата кыттабыт. Манна биһиги аҕабыт архыыбыттан кини үлэлэрин, хаартыскаларын, кинигэлэрин туруорааччыбыт.

Биир сыл спортивнай значоктар коллекцияларын, араас күрэхтэһиилэр вымпелларын, программаларын туруора сылдьыбыппыт. Бу сырыыга аҕабыт бэйэтэ илиитинэн суруйбут спортивнай оскуола хайдах саҕаламмытын туһунан тэтэрээтин, кини хайдах курдук кыраһыабай буочарын көрдөрөөрүү. Аҕабыт блокноттарын, онно араас күрэхтэһиилэр протоколлара эмиэ илиинэн суруллубуттар. Манна диэн эттэххэ, биһиги аҕабыт Чурапчытааҕы спортивнай интернат-оскуола дириэктэринэн, уһун сылларга выездной тренеринэн үлэлээбитэ.

Бэйэлэрин кэмнэригэр Дмитрий Петрович Коркин, Алексей Спиридонович Шадрин уонна Константин Сергеевич Постников күүстэрэ кыайарынан, сүрэхтэрин баҕатынан көҥүл тустууга сахалар аан дойдуга биллэр буолалларыгар олохторун, өйдөрүн-санааларын барытын ууран үлэлээбит дьон.

Онон бу күннэргэ “Строительнай” рынок Быыстапкалыыр саалатыгар буола турар иитэр-үөрэтэр сыаллаах быыстапканы кэлэн көрөргүтүгэр ыҥырабыт, бэйэҕитигэр туһанаргытыгар баҕарабыт! Быыстапка балаҕан ыйын 13 күнүгэр диэри үлэлиир.

Быыстапканы саҕалааччы, Чурапчытааҕы спортивнай интернат-оскуола выпускнига, Саха Республикатын култууратын үтүөлээх үлэһитэ Татьяна Афанасьевна Гоголеваҕа истиҥ махталбытын тиэрдэбит! Биһиги, быыстапка буоларын тухары кыттан — дьоммут үлэлэрин, олохторун билиһиннэрэ туруохпут.

Саргылана Константиновна ПОСТНИКОВА, К.С. Постников кыыһа, үлэ бэтэрээнэ, норуот уус-уран оҥоһуктарын маастара.