Муҥутуур кыайыылаах Наоя Иноуэ

Кытайдар, кэриэйдэр, дьоппуоннар киинэлэригэр бойобуой искусствоны кинилэр эрэ баһылаабыт курдук көрдөрөллөр. Ол эрээри, ММА-ҕа, боксаҕа даҕаны улаханнык аан дойдуга биллэр спортсменнара суохтар этэ. Япония «прайд» диэн рингэҕэ охсуһууну тэрийбитэ, онно үчүгэй дьоппуоннар бааллар этэ да, бырааттыы Емельяненколар, Мирко Крокоп, Вандарлей Сильва, Кевин Роджерман курдук байыастар тулуппатахтара. Боксаҕа да кытай, кэриэй, дьоппуон спортсменнарыттан биллэр дьон суохтар этэ.

Оттон билигин кыра ыйааһыҥҥа дьоппуон уола Наоя Иноуэ аан дойдуга биллэр боксер буолла. Түөрт версияны баһылаан, абсолютнай чемпион буолла. Биир даҕаны хотторуута суох баран иһэр, кыра хатыҥыр боксер диэтэххэ, үксүн дөйүтэн кыайар. Суолун иннигэр туора туран, утарыласпыттары барыларын, уҥа-хаҥас биэртэлээн иннин диэки дьулуһар. Аан дойдуга албан ааттаах Али Мухаммед бирииһигэр супер версиятыгар киирсэн, тэгил тэҥнээҕин булбатаҕа.

Омос көрдөххө, уу ньулдьаҕай, киһи сэнии көрөр киһитин курдук. Брюс Ли курдук эрийэ хаппыт иҥиир ситии да курдук буолбатах. Ол эрээри, киирэн охсон, кулаан бардаҕына, утарылаһааччылара быарга табыллан, рингэҕэ күөлэһийэн тыын ыла сатаан булумахтаһаллар. Эбэтэр сыҥаахха табыллан, тоҥ тууччаҕы бырахпыттыы түһэллэр.

Наоя Иноуэ — Япония Дзама диэн кыра куоратыгар 1993 сыллаахха төрөөбүтэ. Аҕалара Синго Иноуэ боксер буолан, уолаттара эмиэ кини туйаҕын хатаралларыгар баҕарара. Ол баҕата туолан, уола аан дойдуга аатыран үөрүүтэ муҥура суох. Аҕалара уолаттарын универсальнай саллаат курдук дьарыктыыра. Наоя быраатынаан Такумалыын аҕалара ыарахан үөрэҕин нэһиилэ тулуйаллара. Хайаҕа сүүрэн тахсаллара, тиритэн-хорутан дьарыктаналлара Наоя аҕатын маннык быһыытын кэнники, чемпион буолан баран биирдэ өйдөөбүтэ.

Оҕо эрдэхтэриттэн тулуурдаах, дьулуурдаах буола иитиллибит спортсменнар аан дойдуга абсолютнай чемпиона буолар буоллахтара.

ОРОДЬУМААН.