Истиҥ көрсүһүү

Сылын аайы ыытыллар «Коркинныы олоруохха. Коркинныы айыахха!» быыстапка чэрчитинэн араас сэргэх тэрээһиннэр быыстала суох буолаллар. Ол курдук, балаҕан ыйын 9 күнүгэр, Чурапчытааҕы спорт кыһатын 1975 сыллаахха үөрэнэн бүтэрбиттэри уонна бу кылаас биир бастыҥ үөрэнээччитэ – тустууга үтүөлээх тренер Иван Николаевич Сивцев бииргэ төрөөбүттэрин, оҕолорун кытта көрсүһүүлэр тэрилиннилэр.

Улуу тренер Дмитрий Петрович Коркинна анаммыт быыстапка саалатыгар аатырбыт Чурапчытааҕы спортивнай интернат-оскуоланы үйэ аҥаара анараа өттүгэр бүтэрбит, билигин 60 саастарын лаппа ааспыт дьон, хайдах үөрэммиттэрин, таптыыр дьарыктарын билиһиннэрдилэр. Бииргэ үөрэммит доҕордоро Иван Николаевич Сивцев туһунан истиҥник ахтан аһардылар.

Санатан эттэххэ, бу кылааска спорт үтүөлээх маастара Василий Гоголев, норуоттар икки ардыларынааҕы кылаастаах спорт маастардара Григорий Христофоров, Иннокентий Аянитов, ССРС спордун маастардара Василий Данилов, Егор Борисов, Роман Цыпандин, Михаил Каженкин, Иван Сивцев, Прокопий Сивцев, Николай Матвеев, Аскалон Кардашевскай, барыта 23 маастар үөрэммит. Онон тахсыылаах кылаас диэн үрдүктүк сыаналыыбыт.

Кинилэр билиһиннэрбиттэринэн, 1975 сыллаахха Чурапчытааҕы спортивнай интернат-оскуоланы Саха сирин 16 оройуоннарыттан кэлбит 70 оҕо, икки кылааһынан үөрэнэн бүтэрбиттэр.

Кинилэр киэн туттууларынан буолаллар: ССРС спордун үтүөлээх маастара Василий Николаевич Гоголев, ССРС спордун норуоттар икки ардыларынааҕы кылаастаах маастардара Иннокентий Егорович Аянитов уонна Григорий Николаевич Христофоров, 20 – ССРС спордун маастардара, 10 – СӨ спордун маастардара, 2 – ССРС туйгуннара, 2 – Россия үтүөлээх үлэһиттэрэ, 4 – Россия туйгуннара, 8 – СӨ үтүөлээх үлэһиттэрэ, 9 – СӨ туйгуннара, 7 – оройуон, улуус ытык киһилэрэ уонна 10 – нэһилиэк ытык киһилэрэ.

Ону таһынан, Монастырева — Протодьяконова Ольга Дмитриевна, 7 оҕолоох; Теплоухова — Петрова Инна Семеновна 7 оҕолоох, СӨ доруобуйатын харыстабылын туйгуна, «Ийэ буолуу» 1, 2 степеннээх мэтээллэрдээх, үлэ бэтэрээнэ. Чурапчыга бастакынан үс игирэ оҕоломмут ийэ. Оҕолоро үөрэхтээх, идэлэрин баһылаабыт үлэһит үтүө дьоно, бары дьиэ-кэргэн тэринэн, оҕо-уруу төрөтөн саха мааны ыала дэтэн Чурапчыларыгар олороллор; Семенова — Попова Прасковья Кононовна, 5 оҕолоох, үлэ бэтэрээнэ; Суслова — Дьячковская Марта Николаевна, 5 оҕолоох, СӨ доруобуйатын харыстабылын туйгуна, үлэ бэтэрээнэ, «Ийэ буолуу» 2 степенэ мэтээллээх.

Ити кинилэр ситиһиилэрин оҕо спортивнай интернатын-оскуолатын төрүттээччи, оскуола дьылҕатыгар сүдү сабыдыаллаах реформатор-дириэктэр Алексей Спиридонович Шадрин салайбыт педколлективын үлэтин түмүгэ диэн бары биир санаанан этэллэр.

Көрсүһүүгэ Чурапчы кыһатын ситиһиилээхтик үөрэнэн бүтэрэн, төрөөбүт дойдуларыгар, республикаларыгар биллиилээх, таһаарыылаах специалистар буолан тахсан, улахан кылааттарын киллэрсибит ытыктабыллаах дьон кыттыыны ыллылар.

Ол курдук, Филиппов Михаил Афанасьевич, Казахстанҥа Абай аатынан пединститутун бүтэрбит, ССРС уонна СӨ спордун маастара; Олесов Владимир Владимирович, СГУ матфакын бүтэрбит, Хаҥаласка спорткомитет бэрэссэдээтэлинэн, Ой орто оскуолатын дириэктэринэн үлэлээбит; Пудова Анна Николаевна, Улан-Удэтээҕи култуура институтун бүтэрбит, Саха радиотын сүрүн режиссера, ССРС култууратын туйгуна, СӨ култууратын үтүөлээх үлэһитэ, СӨ суруналыыстарын Н.А. Кондаков аатынан СӨ бириэмийэтин лауреата; Парфенов Иван Николаевич, «Комплекс» ХЭТ саа генеральнай дириэктэрэ, Россия үтүөлээх фермера, СӨ норуотун хаһаайыстыбатын үтүөлээх үлэһитэ, СӨ тыатын хаһаайыстыбатын туйгуна, СӨ Президенин гранын 3 төгүллээх хаһаайына; Батучина Надежда Никитична, СГУ т/х факультетын бүтэрбит, ХИФУ ИЕН лабораториятын сэбиэдиссэйэ, ХИФУ уонна профобразования бэтэрээнэ; Керемясова Лена Петровна, СГУ ИФФ нуучча тылын салаатын уонна Санкт-Петербургдааҕы киинэ уонна телевидение университетын бүтэрбит, СӨ үөрэҕириитин туйгуна, СӨ култууратын үтүөлээх үлэһитэ, СӨ суруналыыстарын «Кыһыл көмүс микрофон» конкурсун лауреата, «Саха» НКИХ продюсера; Мухоплев Андрей Владимирович, Полтаваҕа тутуу институтун уонна Минскэйгэ ССРС КГБ Үрдүгү куурстарын бүтэрбит, КГБ-ФСБ отставкаҕа олорор подполковнига, байыаннай сулууспа бэтэрээнэ; Каженкин Михаил Михайлович, СГУ БГФ бүтэрбит, СӨ үтүөлээх тренерэ, В.П. Керемясов аатынан ДЮСШ-3 тренерэ; Макаров Иван Васильевич, үлэ уонна спорт бэтэрээнэ.

Оскуоланы бүтэрбиттэрэ үйэ аҥардаах кэрэ бэлиэ түгэнинэн кинилэр Тоҕус томтордоох Чурапчыга тиийэн үөрүүлээхтик бэлиэтээбиттэрин, оччотооҕу учууталларын, оскуола үлэһиттэрин кытта көрсүбүттэрин, эҕэрдэлээбиттэрин үөрэ-көтө кэпсээтилэр.

Көрсүһүү түмүгэр кинилэр, былырыын олохтон туораабыт бииргэ үөрэммит доҕордоро – көҥүл тустууга ССРС спордун маастара, Саха Республикатын уонна Российскай Федерация үтүөлээх тренерэ Иван Николаевич Сивцев оҕолоругар, үбүлүөйгэ анаан оҥотторбут бэлэхтэрин туттардылар.

Петр ПАВЛОВ.

Ааптар хаартыскалара.