Дүллүкүлэр былырыыҥҥы кыайыыларын чиҥэттилэр

Балаҕан ыйын 19 күнүгэр Бүтүн Арассыыйа үрдүнэн сүүрүү күнэ бэлиэтэнэр. Бүттүүн Арассыыйа барыта сүүрэр күнэ. Ол курдук, хас биирдии куоракка, улууска, нэһилиэккэ «Кросс-нации» ыытыллар.

Үөһээ Бүлүү улууһугар бу күн үрдүк таһымнаахтык ыытылынна. Улуус оскуолаларын оҕолоро, Үөһээ Бүлүүтээҕи улуустааҕы техникум, олохтоохтор бука бары «Кросс-нации» сүүрдүлэр.

Үөһээ Бүлүүтээҕи легкоатлетическай манежа Далыр нэһилиэгиттэн төрүттээх, Саха АССР спордун маастара, өрөспүүбүлүкэ рекордсмена, физкультура учуутала, тренер Андрей Иванович Донской аатын иҥэрэр үөрүүлээх тэрээһин буолан ааста.

Күммүт-дьылбыт наһаа туран биэрбэтэр да, оскуолалар икки ардыларынааҕы сылын ахсын ыытыллар эстафета буолла. Уопсайа 6 оскуола кыттыыны ылла. Эстафета маннык этаптарынан ыытылынна:

1 этап 1-4 уол – 100 м

2 этап 1-4 кыыс – 100 м

3 этап 5-8 уол – 100 м

4 этап 5-8 кыыс – 100 м

5 этап 9-11 уол – 200 м

6 этап 9-11 кыыс – 200 м

7 этап физкультура учуутала – 200 м

8 этап оскуола үлэһитэ (дьахтар) – 100 м

9 этап оскуола үлэһитэ (эр киһи) – 100 м

10 этап оскуола дириэктэрэ – 50 м.

Маҥнайгы миэстэ буолла, Дүллүкү орто оскуолата, санатан эттэххэ, Дүллүкү оскуолата былырыыҥҥы эстафета кыайыылааҕа буолар.  Иккис миэстэ – Исидор Никифорович Барахов аатын сүгэр 1-кы нүөмэрдээх оскуола. Үһүс бочуоттаах үктэлгэ таҕыста Дмитрий Спиридонович Спиридонов аатын сүгэр улуустааҕы гимназия.

Чөл олоҕу тутуһуҥ, спордунан дьарыктаныҥ!

Алина САННИКОВА, Дүллүкү орто оскуолатын 11-с кылааһын үөрэнээччитэ, «Эрчим» медиакиин эдэр кэриспэндьиэнэ. 

Үөһээ Бүлүү.