Чемпионат иккис күнэ тугу түстүүр?

Хорватия Загреб куоратыгар көҥүл тустууга аан дойду чемпионатын иккис күнүгэр күрэхтэһиини – 57, 74, 79, 92 киилэлээхтэр саҕалыыллар.

Оттон бүгүн Георгий Окороков (61 кг) уонна Виктор Рассадин (70 кг) бэйэлэрин күүстэрин холоһон көрдүлэр даҕаны – табыллыбатылар. Окороков бастаан Хотугу Македония бөҕөһө Бесир Алилины 7:1 ахсаанынан кыайан баран, салгыы күрэхтэһиигэ казах Асылжан Есенгельдылыын тустуутугар албаска киирэн биэрэн, очукуонан ыраастык хоттордо.

Салгыы хапсыһыыга Есенгельды – Завур Угуевка (Россия) хоттордо. Онон Окороков күрэхтэһииттэн тохтуурга күһэлиннэ.

Оттон бу түһүлгэҕэ биир эрэммит киһибит Виктор Рассадин армянин Арман Андреасяны, хапсыһыы бүтэрэ кыра бириэмэ хаалыар диэри 5:3 ахсаанынан баһыйан иһэн, атахха киллэртэрэн кэбиһэн, түмүккэ 5:5 ахсааҥҥа хобдохтук хотторон кэбистэ. Кини салгыы тустара дуу, тустубата дуу Армения бөҕөһө финал аҥаарыгар хайдах тустуутуттан тутулуктаах. (Сырдатыыны ситэрэн биэрдэххэ, бөөлүүн түүн 03 чаас иннинэ Андреасян — дьоппуон Оаягига 0:8 ахсаанынан хотторон, биһиги эрэлбитин сотон кэбистэ — П.П.).

Онон бастакы күн бөҕөстөрбүт бэйэлэрин ыалдьааччыларын хомоттулар диэххэ сөп.

Чемпионат иккис күнүгэр үс бөҕөспүт тустар. Үһүөн – 57 киилэҕэ. Итиэннэ киһи бэркиһиэн, сэрэбиэй түмүгүнэн үһүөн биир бөлөххө түбэспиттэр. Ол аата, аллараа бөлөххө.

Хотугу Македония аатыттан кыттар Владимир Егоров – Азия чемпиона, Олимпиада-2024 боруонса призера индус Аман Сехраваты, Таджикистан чиэһин көмүскүүр Айаал Белолюбскай – Россия чемпиона Муса Мехтихановы, Беларусь хамаандатыттан Арыйаан Тютрин – казах Адилет Алмухамедовы кытта тусталлар.

Бу бөлөххө өссө дьоппуон Сакамото, кыргыз Алмаз Уулу, азербайджанец Базарганов, узбек Абдуллаев курдук биллэр-көстөр бөҕөстөр баалларын санаттахха, тыҥааһыннаах тустуулар күүтүллэллэр.

Биһиги бэйэбит бөҕөстөрбүтүгэр ситиһиилээх тустууну баҕарабыт! Саҕалааһын төһө даҕаны мөлтөҕүн иһин, тустууктарбытыгар бүтэһиккэ диэри эрэнэбит. Этэргэ дылы, эрэл кыыма бүтэһиккэ тиийэн уостар.

Чемпионат хапсыһыылара Дьокуускай бириэмэтинэн киэһэ 17:30 чаастан саҕаланаллар. Быһа биэриини IRON сахалыы кэпсээн-ипсээн көрдөрүөҕэ. Күрэхтэһии хаамыытын уонна чемпионат атын да сонуннарын «Дьулурҕан» хаһыат dzulurgan.ru сайтыгар уонна телеграмҥа t.me/dzulurgan каналыгар тутатына көрүөххүтүн-билиэххитин сөп.

Петр ПАВЛОВ.