Быыстапкаҕа ыҥырабыт!

Балаҕан ыйын 5-12 күннэригэр Строительнай Атыы-эргиэн киинин Быыстапкалыыр саалатыгар ССРС, РСФСР, Саха АССР үтүөлээх тренерэ Дмитрий Петрович Коркиҥҥа аналлаах «Коркинныы олоруохха. Коркинныы айыахха!» диэн республикатааҕы быыстапка үлэлиир.

Саха Республикатын култууратын үтүөлээх үлэһитэ Татьяна Афанасьевна Гоголева көҕүлээһинэн быйылгы, ахсыс төгүлүн субуруччу тэриллэр быыстапкаҕа Амма, Чурапчы, Эдьигээн улуустарыттан тиийэ, ону тэҥэ Ем. Ярославскай аатынан музей, Саха сирин национальнай библиотеката, Олимпийскай эрэл училищета, олимпийскай призёр Александр Иванов, улуу тренер үөлээннээҕэ К.С. Постников архыыба, биллиилээх коллекционердар Юрий Щукин, Владислав Коротов, Д.П. Коркин бастыҥ үөрэнээччитэ Дмитрий Егоров, Саха Республикатын үтүөлээх тренердэрэ Афанасий Лугинов, Прокопий Иванов, Д.П. Коркин үөрэнээччилэрин, уо.д.а сэдэх экспонаттарын көрүөххүтүн сөп.

Быыстапка кэмигэр үгэс быһыытынан биллиилээх спортсменнары, тренердэри кытта көрсүһүүлэр, саҥа кинигэлэр сүрэхтэниилэрэ буолуохтара.

Барыгытын быыстапкаҕа кэлэн көхтөөхтүк кыттаргытыгар ыҥырабыт!

Петр ПАВЛОВ.

Ааптар хаартыскалара.