«Бастыҥнар Күүстэрэ»

Балаҕан ыйын 13 күнүгэр Максим Кирович Аммосов аатынан Хотугулуу-Илиҥҥи Федеральнай университет «Бастыҥнар Күүстэрэ» («Сила Первых») тэрээһинэ Туймаада туонатын Үс Хатыҥ сиригэр-уотугар буолан ааста.

Сылын аайы ыытыллар киэҥ хабааннаах тэрээһини устудьуоннар Первичнай профсоюзнай тэрилтэлэрэ (ППОС ХИФУ) тэрийэр. Манна маҥнайгы куурус устудьуоннара, ону тэҥэ ХИФУ үөрэхтэрин актыбыыстара сүрүн күүс, суолта буолаллар. Биир күннээх тэрээһиҥҥэ станцияларынан оонньуулар, рейв концерт, многоборье күрэхтэһиитэ уонна да элбэх тэрээһиннэр ыытыллаллар. Устудьуон аймах күһүн үөрэх саҕаланыыта сөбүлээн сылдьар күүтүүлээх күнэ буолар.

Сүрүн болҕомтону тардар көрүҥүнэн многоборье — «Дыгын оонньуулара» буолаллар. Буоларын курдук, иккилии үөрэх буолан биирдии хамаандаҕа холбоспуттара. Барыта 9 кус быһый, ат бөҕө эр бэртэрэ – эдэр уоланнар хамаандаларын аатын көмүскээтилэр. Кинилэр биэс сахалыы көрүҥнээх тургутууну аастылар – сүүрүү, оҕунан ытыы, тутум эргиир, хапсаҕай уонна таас көтөҕүүтэ.

Тыҥааһыннаах күрэхтэһии кыайыылаахтары быһаарда. Ол курдук, бэйэтин иннигэр кими да көрбөккө, эрэллээхтик ИЯКН уонна ИФКиС хамаандатыттан Ньурба Ньургуна Валентин Афанасьев маҥнайгы миэстэни ылыан ылла. Иккис миэстэҕэ олус үчүгэйдик кыттыыны ылан ГРФ уонна ФЛФ хамаандатыттан Андрей Оленов таҕыста. Үһүс бочуоттаах миэстэни ИП уонна КИТ аатыттан кыттар Евгений Николаев ылла.

Ити курдук эдэр дьон биһирэбилин, болҕомтотун ылбыт многоборье көрүҥэ «Дыгын оонньуулара» олус көхтөөхтүк, биир тыынынан ыытылыннылар. Сылын аайы өссө да буола туруохтара,саҥа кыайыылаахтары таһаарыахтара.

Анжелина ЖДАНОВА, ХИФУ 2-с кууруһун устудьуона.

ППОС ХИФУ «Медиа киинин» түһэриилэрэ.