Элбэх кыттааччылаах, сытыы киирсиилээх…

«Доҕордоһуу» түмэл туонатыгар бииргэ үлэлээбит доҕорбут, суоттулар биир тарбахха баттыыр киһибит, мелодист, сыана бэтэрээнэ, мас ууһа, нуучча дуобатыгар ССРС спордун маастарыгар кандидат Алексей Алексеевич Львов кэриэһигэр Уус Алдаҥҥа олорор уонна Уус Алдантан төрүттээх дуобаччыттарга анаан турнир буолан ааста.

Бу турнир аан бастаан 2005 сыллаахха ытык киһибит, учууталбыт, наставникпыт, ийэбит,  «Доҕордоһуу» музейы төрүттэспит Раиса Реасовны Кулаковская көҕүлээһининэн тэриллибитэ. Онтон ыла номнуо 20 сыл ааһа охсон, оччотооҕу оонньообут оҕолор билигин үөрэхтэнэн-хаарданан, үлэһит үтүөтэ буолан, дьиэ-уот тэринэн, оҕолонон-урууланан ийэ-аҕа буолан олордохторо!

Ол 2005 сыллаахха буолбут бастакы күрэхтэһии чемпиона, билигин аан дойдуга биллэр гроссмейстер, республикатааҕы категориялаах судьуйа Пётр Петрович Ушницкай уонна биир дойдулаахпыт, ХИФУ преподавателэ, эмиэ республикатааҕы категориялаах судьуйа Семён Владимирович Местников күрэхтэһиини бэркэ баһылаан-көһүлээн ыыттылар. Кыттааччылар да бэлиэтээбиттэринэн, бу турнир буоларын курдук элбэх кыттааччылаах, киэҥ географиялаах, сытыы киирсиилээх, тэрээһинэ да үрдүк диэн буолла. Ол курдук, эр дьоҥҥо бастакы миэстэни Пётр Ушницкай (Дүпсүн), иккиһи Михаил Копырин (Сыырдаах), үсүһү Николай Пермяков (Суотту) ылары ситистилэр.

Кыргыттарга эдьиийдии-балыстыы Скрябиналар кими да тулуппатылар, үрдүк таһымнаах оонньооччулар буолалларын көрдөрдүлэр. Ол курдук, эдьиий киһи Ангелина бастакы, Арина иккис миэстэлэри ылыахтарын ыллылар, үһүскэ Мария Яковлева таҕыста.

Бу күрэхтэһиигэ Алексей Алексеевич огдообото, ытыктабылаах Зоя Дмитриевна уонна оруобуна аны биир ыйынан буолуохтаах улууспут баһылыгын быыбарыгар кандидатынан турбут, дойдубут сайдыытыгар саҥа, кэскиллээх хамсааһыннары киллэрбит Василий Иванович Аммосов,  соторутааҕыта Суотту баһылыгын быыбарыгар лаппа баһыйан олохтоохтор итэҕэллэрин ылбыт Василий Петрович Баишев, Уус Алданнааҕы техникуму  таһаарыылаахтык салайан үлэлэтэ сылдьар, улууспут мунньаҕын депутата Андрей Васильевич Стрекаловскай, улуустааҕы Ытык Сүбэ салайааччыта Николай Герасимович Жирков, спорт пропагандиһа, сорсуннаах булчут, Алексей Алексеевич чугас доҕоро, нуучча дуобатыгар ССРС маастарыгар кандидат, билигин биһиги ортобутугар суох Иван Васильев төрөппүт кыыһа, Суотту нэһилиэгин депутата Нюргустана Ивановна Жиркова кэлэннэр эҕэрдэ тылын эттилэр, анал бириистэри туттардылар, күрэхтэһии таһымын үрдэттилэр.

Оннук анал бириистэр хаһаайыннарынан буоллулар: саамай эдэр, кырачаан дуобаччыт, Дьокуускай куорат 2-с кылааһын туйгун үөрэнээччитэ Виктория Парникова, саамай саастаах оонньооччу – Бэрт Ууһун ытык олохтооҕо, 85 саастаах Гаврил Гаврильевич Портнягин, спорт бастыҥ тэрийээччилэрэ – краевед, энтузиаст, нуучча дуобатыгар ССРС маастарыгар кандидат Григорий Гаврильевич Портнягин, бу турниры үрдүк таһымҥа ыыппыт, республикатааҕы категориялаах судьуйа, суоттулар бэйэбит уолбут Семён Владимирович Местников буоллулар.

Онон улууспут дуобаччыттара бары да астынан, дуоһуйа күрэхтэһэн, ахтылҕаннарын таһааран, аны эһиил дуобат тумара хонуутугар бары көрсүөхпүт дэһэн, үөрэн-көтөн тарҕастылар.

PS: Суоттулар спорт араас көрүҥэр элбэх ситиһиилээх нэһилиэк буолабыт. Аҥардас нуучча дуобатыгар ССРС уонна РФ маастарыгар кандидаттар тохсуо эбиттэр. Ол кимнээхтэр эбитий? Алексей Львов, Иван Васильев, Иван Заровняев, Николай Пермяков, Григорий Портнягин, Михаил Охлопков, Сергей Николаев уонна убайдыы-бырааттыы Ян, Андрей Пермяковтар. Онон эһиилгиттэн ыла Алексей Алексеевич Львов турнирын арыый уларытан, өссө кэҥэтэн «Суотту дуобаччыттарын кубога» диэн ааттаан тэрийиэххэ уонна республика календарнай былааныгар киллэрэр туһугар кэпсэтиини ыытыахха диэн этии киирбитин, мин өйүүр былааннаахпын. Онно дуобаччыттар, эһиги санааҕыт?

Степан ОХЛОПКОВ – Айым.