Ытык Күөл оонньууларга бэлэм!

От ыйын 8 күнүгэр Ытык Таатта киинигэр Ытык Күөлгэ саха төрүт көрүҥнэригэр Манчаары XXII оонньууларын үөрүүлээхтик аһыы сиэрэ-туома буолла. Тэрийээччилэр иһитиннэрбиттэринэн, оонньуу – киэҥ Саха сирин араас муннуктарыттан, 35 хамаандаттан барыта 1521 кыттааччыны түмтэ. Кинилэр бары хас эмэ түһүмэхтээх сүүмэрдээһини ааһан, бастыҥтан бастыҥнар, чулууттан чулуулар буолан тиийэн кэлэн бэйэлэрин күүстэрин, кыахтарын бар дьонноругар көрдөрөн астыннараллар.

Саха Өрөспүүбүлүкэтин Ил Дархана Айсен Сергеевич Николаев бар дьонун иннигэр үөрэн-көтөн, астынан туран, саха төрүт көрүҥнэрэ – биһиги баайбыт, улахан сэҥээриини ылар киэн туттар түгэммит буоларын эттэ. Ол да быһыытынан, саха дьоно бэйэбит төрүт көрүҥнэрбитигэр үгэскэ кубулуйбут күрэхтэһиини сыа-сым курдук харыстабыллаахтык, кичэллээхтик тутан 21-с төгүлүн тэрийэн кэлбитин санатта. Быйылгы, 22-с оонньуу Ытык Тааттаҕа ыытыллара дириҥ ис хоһооннооҕун, Таатта – бу саха омугун тумус туттар дьоно, саха духуобунаһын баайын сайыннарбыт Алексей Елисеевич Кулаковскай – Өксөкүлээх Өлөксөй, Платон Алексеевич Слепцов – Ойуунускай, Анемподист Иванович Софронов – Алампа төрөөбүт дойдулара буолан, ытыктанарын эттэ. Итиэннэ таатталар биир сомоҕо буолан, бу улахан тэрээһини бэлэмнээн, тэрийэн ыытыыны кыайа-хото тупуттарыгар махталын биллэрэн баран, саха төрүт көрүҥнэригэр Манчаары оонньууларын аһыллыбытынан аахта.

Эһиги болҕомтоҕутугар Оонньуулары үөрүүлээхтик аһыы түгэннэрэ:

Петр ПАВЛОВ хаартыскалара.