Василий Егоров: “Маннык тэрээһиҥҥэ сылдьыбыппыттан олус астынным”

Саха төрүт көрүҥнэригэр Манчаары XXII оонньууларын биһиги биллэр, киэн туттар спортсмеммыт, боксаҕа Европа икки, Россия биэс төгүллээх чемпиона, аан дойду чемпионатын үрүҥ көмүс призера, спорт үтүөлээх маастара Василий Егоров көрө-истэ сылдьар.

Бүгүн кинини “Дьулуруйар Ньургун Боотур” стадиоҥҥа мас тардыһыытын күрэхтэһиитин көрө сылдьарын түбэһэ түһэн, кылгастык санаатын этэригэр көрдөстүбүт.

—Оонньуу бастакы күнүттэн олус сэҥээрэн көрө сылдьабын, — диир Василий. – Манчаары оонньуутун үөрүүлээхтик аһыллыытын сиэрэ-туома наһаа үчүгэйдик ааспыта. Бэйэм санаабар, наһаа дириҥ ис хоһоонноох арыйыы буолбута. Сценарийдара сахалыы тыыннаах этэ. Саха төрүт көрүҥнэрин көрдөрдүлэр.

Итиэннэ бу оонньуунан сибээстээн төрүт тылга суолта биэрэн, туспа тэрээһин оҥорбуттара саамай сөптөөх. Кырдьык, хас биирдии саха бэйэтин төрөөбүт тылын билиэхтээх уонна сөптөөхтүк саҥарыыга-суруйууга дьулуһуохтаах дии саныыбын.

Күрэхтэһиилэр тустарынан эттэххэ, бу оонньуу – Саха сирин Олимпиадатын быһыытынан ааттарын быһыытынан, таһыма улахан. Тэрээһиннэрэ үчүгэй. Таатталар үчүгэйдик бэлэмнэммиттэрэ, бары биир хамаанда буолан үлэлээбиттэрэ көстөр. Бу, “Ньургун Боотур” стадион уонна Күрэс уораҕайа курдук, тыа сиригэр суох улахан баараҕай тутуулар оҥоһуллубуттар. Мин 2016 сыллаахха Риотааҕы Олимпиадаҕа кыттыбытым, онон син биир тэҥнээн көрөр буоллаҕым. Оонньуу таһымын сыаналаатым.

Күрэхтэһиилэри таһынан култуурунай тэрээһиннэрэ элбэх эбит. Бары билэрбит курдук, Таатта улууһуттан элбэх биллиилээх дьон үүнэн-сайдан тахсыбыттара. Бэҕэһээ биһиги Платон Алексеевич Ойуунускай төрөөбүт алааһыгар экскурсияҕа тиийэ сылдьыбыппыт. Онно Сахаада-спорт ассоциация, төрүт көрүҥнэргэ “Модун” киин уонна Спорт министиэристибэтэ былырыыҥҥыттан “Боотурдар көлүөнэлэрэ” диэн бырайыак оҥорбуттар, ол түмүгүнэн кинигэ таһаарбыттар. Итини таһынан саха төрүт көрүҥнэрэ салгыы сайдыыларыгар киэҥ кэпсэтии буолла.  

Ис иһиттэн Манчаары оонньуута хайдах бара турарын барытын көрө-билэ сылдьабын. Холобура, бу мас тардыһыыта буола турар. Сүрдээх тыҥааһыннаах күрэхтэһии буола турар. Итини сэргэ сүүрүүнү, атах оонньуутун көрдүм. Оонньуу түмүгүнэн хамаанданан түмүк тахсарын быһыытынан, бэйэм төрөөбүт улууһум спортсменнарыгар ыалдьабын. Кинилэргэ ситиһиилэри баҕарабын. Маннык тэрээһиҥҥэ сылдьыбыппыттан олус астынным.

Сэһэргэстэ Петр ПАВЛОВ.    

Ааптар хаартыскаҕа түһэриитэ.