Уолбут Роман кыайыытыттан үөрэбит, киэн туттабыт

Күүтүүлээх Манчаары оонньуулара буолан аастылар. Биһиги аймах бары долгуйа күүттүбүт, сэҥээрэн Тааттаҕа баран да, телевизорынан, НВК сыһыарыытынан омук да сириттэн астына-дуоһуйа көрдүбүт. Дэлэҕэ да «Саха Олимпиадата» диэн ааттаныа дуо?

Үөрүүбүтүн ордук сиэним Ромабыт, Роман Николаев үрдэттэ. Бары аймах тыҥааһыннаах күрэһи, Ромабыт хас биирдии хамсаныытын, туругун, илиитин-атаҕын күүрүүтүн, былчыҥнара тыҥыырын манаһа көрдүбүт, ыраахтан да буоллар, кыралыын-улаханныын ыһыытыы-хаһыытыы олордубут. Саха киһитин сиэринэн, айыыларбытыттан көрдөһөн алаадьылаан, сирбитин-уоппутун маанылаатыбыт. Биһиги дьолбутугар үөрүү кыымнара, өрөгөйө биһиэхэ тосхойдо.

Рома эһэтэ Леонид Николаев ХХ үйэ бастыҥ хапсаҕайдьыта. Бэйэтин кэмигэр “Манчаары оонньууларыгар” хаста да кыттыбыта, иккитэ боруонса хаһаайына, оттон 1995 сыллаахха оруобуна 30 сыллааҕыта Мэҥэ-Хаҥалас Төҥүлүтүгэр ХV “Манчаары оонньууларыгар” чөмпүйүөн аатын  ылбыта.

Оттон Ромабыт 2025 сылга эмиэ 85 кг үрдүк чыпчаалга таҕыста. Онон сахалыы “туйах хатарааччы” диэн сэмэйдик үөрэбит, киэн туттабыт. Ытык Таатта сирэ биһиэхэ элбэх үөрүүнү бэлэхтээбитэ. Рома эһэтэ Леонид Николаев улуу убайбыт Былатыан Ойуунускай 100 сааһын туолар үбүлүөйдээх ыһыаҕар бастакы бэрисидьиэн Михаил Николаев, Арассыыйа бэрэсидьиэнэ Борис Ельцин көрөн олордохторуна муҥутуур кыайыылаах буолбута, билиҥҥээҥҥэ диэри “молодцы, вилюйские богатыри” диэн илии тутуспута уос номоҕо буолан, Ромабыт тустар кэмигэр, саха норуотун ааттаах-суоллаах комментатора Александр Васильевич — Көрдүгэн көрөөччүлэргэ иһитиннэрэр. Таатта сирэ биһиги аймахха өссө икки “кыһыл көмүс” күтүөттэри бэлэхтээбитэ. Улахан күтүөтү Туора Күөлтэн Анатолий Заболоцкайы, кыра күтүөтү Харбалаахтан Дмитрий Портнягины. Онон, биһиги Таатта сиригэр-уотугар, күтүөттэрбитигэр, аймахтарбытыгар махталбыт муҥура суох.

Ромабыт отой кыра эрдэҕиттэн Бүлүү Кыргыдайыгар төлөһүйэн, уһуйааныгар, оскуолатыгар үөрэнэн, тустуу бастакы хардыыларын онно ааспыта. Кыргыдай бастыҥ физкултуураҕа учуутала Петр Петрович Ядреев, тустуук буолар бастакы олуктарын уурбут, араас сирдэринэн сырытыннаран күрэхтэһиннэрэн, эрчийэн-такайан таһаарбыт Кыргыдайтан төрүттээх тустуу тренерэ Роман Гаврильевич Окоемов, оттон билигин хапсаҕайга дьарыктыыр эмиэ Кыргыдайтан төрүттээх уолбут, үөрэнээччибит Дмитрий Акимов.

Ромабыт араас күрэстэргэ кыттарыгар өрүү күүс-көмө буолар Кыргыдай баһылыга, эдэр эрчимнээх салайааччы Василий Егорович Александров. Түгэнинэн туһанан, барыларыгар барҕа махтал тылларын аныыбыт. Бастакы “Манчаары оонньууларыгар” Кыргыдайтан Семен Алексеев-Сэмэнчик ыарахан ыйааһыҥҥа кыттан, чөмпүйүөн үрдүк аатын ылан турардаах. Онон, тапталлаах Кыргыдайбытыгар уһун сыллар кэннилэриттэн, уоллара Роман Николаев хапсаҕайга кыһыл көмүһү аҕалла.

Ромабытыгар, инники өттүгэр өссө улахан ситиһиилэри, кыайыылары, чэгиэн-чэбдик туругу, Кыргыдайын, Бүлүүтүн улууһун аатын өрүү дорҕоонноохтук ааттата турарыгар баҕарабыт!

Варвара НИКОЛАЕВА, Манчаары оонньууларын хапсаҕайга кыайыылааҕа Роман Николаев эбээтэ.