Оонньуулар ситиһиилээхтик ыытыллыннылар

Саха төрүт көрүҥнэригэр Манчаары XXII оонньуулара номнуо түмүктэнэн, уос номоҕор киирдэ. Оонньуулар ситиһиилээхтик ыытылыннылар. Этэргэ дылы, сыалларын-соруктарын ситтилэр. Аны 2029 сылга оонньуулар Хаҥаласка буолуохтара.

Саха Өрөспүүбүлүкэтин Бырабыыталыстыбатын 2 №-дээх дьиэтигэр, Манчаары оонньууларын бэлэмнээн уонна тэрийэн ыытар анал хамыыһыйа түмүктүүр түмсүүтэ буолла. Хамыыһыйа салайааччыта, СӨ Бырабыыталыстыбатын бэрэссэдээтэлин солбуйааччы Сергей Васильевич Местников, Тааттаҕа оонньуулар ситиһиилээхтик ыытыллан түмүктэммиттэринэн, хамыыһыйа үлэтин ситиспитин билиһиннэрдэ уонна бары хайысхаларга үлэлээбит, күүс-көмө, өйөбүл буолбут дьоҥҥо махталын биллэрдэ.

Бэлиэ түгэҥҥэ Саха Өрөспүүбүлүкэтин физическэй култуураҕа уонна спорка министрэ Леонид Николаевич Спиридонов оонньуулар уопсай түмүктэрин билиһиннэрдэ. Оттон Таатта улууһун баһылыга Айаал Семенович Бурцев бэлэмнэнии хаамыытын аҕынна, кыттыбыт дьоҥҥо махтанна.

Хаһан баҕарар буоларыныы, сахалыы ылбаҕай ырыа, хомус дьүрүскэннээх тыаһыгар доҕуһуоллатан, оонньуулар ситиһиилээхтик ыытыллалларыгар үлэлэспит дьоҥҥо махтал бэлиэтинэн, өйдөбүнньүк бэлэхтэр, наҕараадалар туттарылыннылар.

Петр ПАВЛОВ.

Ааптар хаартыскаҕа түһэриитэ.