Оонньуу уота Таатта сиригэр кэллэ

Бүгүн, от ыйын 4 күнүгэр, Арыылаах төгүрүк алааһыттан, Манчаары уол оҕо буолан төрөөбүт балаҕанын көмүлүөгүн кыымыттан саҕыллыбыт XXII Манчаары оонньууларын уота ытык Таатта сирин-уотун Чурапчылыын кыраныыссалаһар аартыгар кэллэ.

Бу үтүө тэрээһин Таатта дириҥ түгэхтээх, баай устуоруйалаах өбүгэлэрбит олохторо Ураһа уон түөрт  дулҕаларынан көрдөрүллүбүт, биир санааҕа түмэр, сомоҕолуур саҥардыллыбыт улууспут кыраныыссатын аһыллыытын кытта бииргэ тэрилиннэ.

Былыр-былыргыттан Боотурускай дэнэн тайаан сытар уйгулаах сиргэ номоххо киирбит, аар-саарга ааттаммыт дуулаҕа күүстээхтэр, быһыйдар, бастыҥ хапсаҕайдьыттар төрөөн-үөскээн аастахтара. Өбүгэ оонньуута саҥа үйэҕэ тиийэ оонньонон, аҕыйах хонугунан улахан күрэхтэһии ыытыллаары турара, барыбытын үөрдэр, санаабытын кынаттыыр.

Көҥүл иһин охсуспут, номох буолан кэпсэнэр саха национальнай дьоруойа Баһылай Манчаарыбыт аатынан төрүт оонньуулар уонна ытык сирбит бэлиэтинэн буолар аартыкпыт аһыллыытынан эҕэрдэ тыллары Таатта улууһун баһылыга Айаал Бурцев, Чурапчы улууһун дьокутааттарын мунньаҕын бэрэссэдээтэлэ Яков Оконешников уонна Саха Өрөспүүбүлүкэтин физическэй култуураҕа уонна успуорка миниистирэ Леонид Спиридонов эттилэр.

Кыымтан саҕыллыбыт XXII Манчаары оонньууларын уота барыбытын түмэ, кыайыыларга угуйа от ыйын 8 күнүгэр – Оонньуулар аһыллыыларыгар, саха чулуу ыспарсымыаннарын арыалларынан киирэн күүтүүлээх күрэхтэһиибитин аһыаҕа.

Улуустааҕы Манчаары оонньууларын Пресс киинэ.