Манчаары оонньууларын чэрчитинэн сүүрүү тэриллэр

Ыам ыйын 9 күнүгэр Таатта улууһун киинигэр Ытык Күөлгэ Кыайыы 80 сылыгар аналлаах араас уһуннаах сиргэ дьон көхтөөх сүүрүүлэрэ тэриллибитэ. Улуустааҕы күрэхтэһиигэ Дьокуускайтан, Чурапчыттан эмиэ кэлэн кыттыбыттар. Бу тэрээһиҥҥэ барыта 116 киһи сүүрбүт.

Ол туһунан Таатта улууһун баһылыга Айаал Бурцев суруналыыстары кытта көрсүһүүгэ иһитиннэрдэ.

Сүүрүү табыллыбыт. Тэрийээччилэр да, кыттааччылар даҕаны бары астыммыттар. Итинтэн саҕыллан, саха төрүт көрүҥнэригэр Манчаары оонньууларын кэмигэр маннык сүүрүүнү тэрийиэххэ баара диэн, этии киирбитэ. Ону көҕүлээччилэр оонньуулары бэлэмнээн, тэрийэн ыытар өрөспүүбүлүкэтээҕи хамыыһыйа салайааччыта С.В. Местниковтан көрдөһөн, ыытарга көҥүл ылбыттара.

Онон от ыйын 10 күнүгэр Ытык Күөлгэ дьон түүҥҥү көхтөөх сүүрүүтэ ыытыллар буолла. Кыттааччылар сайаапкаларын номнуо киллэрэн, 700 киһи сүүрэргэ баҕатын биллэрдэ. Сүрүн дьүүлдьүтүнэн Альберт Варламов үлэлиэҕэ.

Кылгастык сүүрүү тосхолун билиһиннэрдэххэ, от ыйын 10 күнүгэр А.Е. Турнин аатынан Күрэс уораҕайын таһыгар киэһэ 23:30 тэрээһин аһыллыыта буолуоҕа. Дьэ, ол кэнниттэн сүүрээччилэр чаас аҥардатыыта буола-буола – 1, 3, 5, 10 км сиргэ сүүрүүлэрэ саҕаланыа. Кыайыылаахтар бары наҕараадаланаллар.

Бу, Манчаары XXII оонньууларыгар анаммыт дьон көхтөөх сүүрүүтүн тэрийээччилэринэн Таатта улууһун дьаһалтата, Таатта нэһилиэгэ, Таатта улууһун чэпчэки атлетикаҕа федерацията буолаллар.

«Дьулурҕан».