Кинигэҕэ 94 киһи сырдатылынна

Манчаары оонньууларын чэрчитинэн «Албан аат» кыраайы үөрэтэр түмэлгэ спорт бэтэрээнэ, общественнай деятель, коллекция мунньааччы Анатолий Григорьевич Мурунов «Таатталар – Манчаарыга» диэн кинигэтин сүрэхтэниитэ буолла.

Кэнники кэмҥэ ханнык баҕарар улахан тэрээһиҥҥэ улуус күрэскэ устуоруйатын көрдөрөр кинигэлэр оҥоһуллан тахсыылара үтүө үгэскэ кубулуйда. Ол курдук, Тааттаҕа ыытыллар Манчаары оонньууларын көрсө түөрт кинигэ таҕыста: спорт бэтэрээнэ Семен Ючюгяев «Таатта хапсаҕайдьыттара», суруналыыс Анна Посельская «Олоҕун тустууттан саҕалаабыта» диэн көҥүл тустууга ССРС спордун маастара Константин Луковцев туһунан, «Таатта» лиссиэй салайааччыта Изабелла Сивцева «Талба Таатта талыы номохторо» диэн кинигэлэрэ күн сирин көрдүлэр.

«Таатталар – Манчаарыга» диэн кинигэҕэ 94 киһи сырдатыллар. Кинилэр күрэс сахалыы көрүҥнэригэр ситиһиилэрэ сиһилии ахтыллар. Кинигэ Таатта улууһун дьаьалтатын көмөтүнэн бэчээттэнэн таҕыста. Билиҥҥи кэм ирдэбилигэр сөп түбэһиннэрэн кытаанах тастаах, бэрт халыҥ, элбэх хаартыскалардаах кинигэ буолбут. Сүрэхтэниигэ эппиттэрин курдук, бу бэйэлэрин олохторун күрэс эйгэтигэр анаабыт дьону ааҕааччыга билиһиннэрии, кинилэр ааттарын үйэтитии буолар. Анатолий Григорьевич күрэс туһунан бу алтыс кинигэтэ.

Бэлиэ күҥҥэ А.Г. Муруновка элбэх үтүө тыллар, эҕэрдэлэр этилиннилэр. Ол курдук, Саха сирин физическэй култуураҕа уонна спорка министрин бастакы солбуйааччы Г.М. Мохначевскай, Таатта улууһун баһылыгын солбуйааччы С.В. Сунхалыров, Саха сирин күрэскэ бэтэрээннэрин салайааччы Г.Г. Сивцев, өрөспүүбүлүкэтээҕи Күрэскэ Албан аат түмэлин дириэктэрэ М.Е. Друзьянов, Духуобунас академиятын академига Б.Ф. Неустроев — Мандар Уус, күрэс бэтэрээнэ, кыраайы үөрэтээччи М.В. Алексеев, суруналыыс В.П. Коротов уо.д.а. ааптары эҕэрдэлээтилэр, сэмэй бэлэхтэрин туттардылар.

Манна сыһыары тутан эттэххэ, өскөтүн «Таатталар – Манчаарыга» кинигэ сүрэхтэниитэ буолан бүппүт буоллаҕына, бу кинигэни хомуйан, суруйан, оҥорон таһаарбыт дуобакка ССРС спордун маастарыгар хандьыдаат Анатолий Мурунов, оонньуу ыытыллар күннэригэр бэйэтин коллекциятын быыстапкатын үлэлэтэр. Быыстапкаҕа кини сүрүннээн значоктарын, вымпелларын, кинигэлэрин, араас күрэхтэһиилэргэ уонн аатырбыт күрэсчиттэргэ анаммыт альбомнара, паапкалара уонна күрэс тиэмэтигэр кинигэлэрэ көрдөрүүгэ туруорулуннулар.

Онон күндү Ытык Күөл олохтоохторо уонна ыалдьыттара, «Албан аат» кыраайы үөрэтэр түмэлгэ, Анатолий Мурунов быыстапкатын быһа ааспаккытыгар баҕарабыт.   

Петр ПАВЛОВ.

Ааптар хаартыскалара.