Көмөҥ иһин истиҥник махтанабыт!

Саха Республикатын Ойуулуур-дьүһүннүүр түмэлин Тааттатааҕы филиалын сэбиэдиссэйэ, Саха Республикатын Суруналыыстарын сойууһун быһаарыытынан, 2024 сыл Бастыҥ уопсастыбыннай корреспондена, Россия Суруналыыстарын сойууһун чилиэнэ Вера Александровна Канаева Манчаары оонньууларын “Саха Бэчээт” тэрилтэ “Забота-Арчы” хаһыатын иһинэн тахсар “Дьулурҕан” сыһыарыыга киэҥник сырдатан кэллэ.

Ол курдук, өссө былырыыҥҥыттан саҕалаан бэйэтэ ааптар быһыытынан Оонньууларга бэлэмнэнии туһунан миэстэттэн элбэх иһитиннэриилэри, интервьюлары, очеркалары, хаартыскалары, видеолары – “Дьулурҕан” сыһыарыыга, бу сыһыарыы сайтыгар, телеграмҥа ханаалыгар элбэхтик бэчээттэттэ. Ону таһынан өссө оскуола оҕолорун суруйууга угуйан, Манчаары оонньууларын туһунан сырдатыыны тэрийбитэ махталлаах.

“Суруллубут суоруллубат!” Вера Александровна тус уонна тэрийбит үлэтэ элбэх ааҕааччы сэҥээриитин ылбыт буолуохтаах диэн бүк эрэнэбит. Төрөөбүт дойдугар – Ытык Тааттаҕа тэриллибит “Манчаары оонньууларын” бэлэмнээн уонна тэрийэн ыытыыга сырдатааччы быһыытынан үлэтэ үрдүктүк сыаналанар.

Киниэхэ, саха төрүт көрүҥнэригэр Манчаары XXII оонньууларын үөрүүлээх түмүктээһинин кэмигэр “Дьулуруйар Ньургун Боотур” стадиоҥҥа, “Саха Бэчээт” тэрилтэ генеральнай дириэктэрэ Н.М. Стручкова илии баттааһыннаах Махтал сурук уонна өйдөбүнньүк бэлэх туттарылынна.

Вера Александровнаҕа көмөҥ иһин истиҥник махтанабыт! Тус бэйэҥ олоххор, айымньылаах үлэҕэр ситиһиилэри баҕарабыт. Биһиги хаһыаппытын кытта салгыы ситимҥин быспаккар эрэнэбит.

Петр ПАВЛОВ, “Дьулурҕан” редактора.

Владислав КОРОТОВ хаартыската.