Күрэс тылын тылбааһын өйүөххэ

Манчаары оонньуутун чэрчитинэн А.Е. Мординов аатынан Таатта лиссиэйин мунньахтыыр саалатыгар спорт тиэрминнэрин сахалытытыы туһунан көрсүһүү тэрилиннэ.

Тэрээһиҥҥэ Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников, СӨ физическэй култуураҕа уонна успорка миниистирэ Леонид Спиридонов, Таатта улууһун баһылыга Айаал Бурцев, күрэс сахалыы көрүҥнэригэр Манчаары аатынан «Модун» өрөспүүбүлүкэтээҕи киинин салайааччыта Геннадий Васильев, «Саха» национальнай көрдөрөр-иһитиннэрэр хампаанньа “күөх экранынан” биэриилэрин сүрүннээччи Олег Колесов кыттыыны ыллылар.

Семинары Үтүөлээх суруналыыс, Бэчээт туйгуна Владислав Коротов салайан, үүннээн-тэһииннээн ыытта.

Манчаары оонньуулара – түөрт сылга биирдэ ыытыллар, дьоҥҥо-сэргэҕэ «Саха сирин Олимпиадатынан» ааттаммыт улахан таһымнаах күрэхтэһиибит буолар. Онон бэйэлээтэр-бэйэбит оонньуубут тэрээһинин тыла-өһө сахалыы буолуохтаах диэн санааттан, нууччалыыттан уонна омук тылыттан киирбит күрэс (спорт) тылларын сахалыы тылбаастыыр санаа үөскээбитэ.

Дьэ, ол санаа Ытык Таатта сиригэр тэриллэр Манчаары оонньууларыттан саҕаламмыта хайдах эрэ икки бүк үөрүүлээх. Тоҕо диэтэргит, Таатта – саха тыынын тутан олорор биир бастыҥ улууспут буолар. Бырабыыталыстыба иһинэн С.В. Местников салайааччылаах тыл тиэрминин хамыыһыйата тэриллэн үлэлиир. Бэрт кылгас кэм иһигэр элбэх тыл ырытыллан, дьүүллэһиллэн, билигин спорт диэн оннугар – күрэс, сахалыы, эбэтэр хотугулуу многоборье диэн оннугар – дэгит күрэс, волонтёр – үтүө көмөһүт о.д.а. тыллары номнуо суруналыыстар уонна күрэс түһүлгэтин кэпсээн ыытааччылар бэйэлэрин суруйууларыгар уонна тылларыгар туттар буолбуттара кэрэхсэбиллээх. Оттон даҕаны атын тыллар үчүгэйдик имитиллэн, күннээҕи туттууга киирэн иһиэхтэрэ диэн бүк эрэллээхпит.

Тэрээһиҥҥэ, Манчаары оонньууларын сырдата-көрдөрө кэлбит суруналыыстар, күрэс эйгэтин дьоно, “Кэскил” хаһыат эдэр корреспонденнара кыттыыны ыллылар, бэйэлэрин санааларын үллэһиннилэр. Холобур, быйылгы оонньуу бас дьүүлдьүтэ (кылаабынай судьуйата) Николай Цыпандин, күрэхтэһии үөрүүлээх аһыллыытыгар үгэс быһыытынан оҥоһуллар дьүүлдьүт андаҕарын урукку курдук нууччалыы буолбакка, сахалыы гыныахха диэн этиитэ биһирэбили ылла. Бу даҕаны түгэн көрдөрөр, бэйэбит тылбытын сайыннарыыга, омук быһыытынан уратыбытын көрдөрүүгэ – үтүө холобур буоларын. Онон Таатта улууһун киинигэр Ытык Күөлгэ буолар саха төрүт көрүҥнэригэр Манчаары XXII оонньууларыгар үөрүүлээх аһыллыытыгар, дьүүлдьүт андаҕара аан бастаан сахалыы тылынан этиллиэ.

Санаа атастаһыытын түмүгүнэн, сотору кэминэн күрэс сахалыы тылдьытын оҥорон таһаарыы соруга турар. Итиэннэ анал бөлөх тылбааска үлэтин атын суруналыыстар, айар үлэнэн дьарыктанар дьон бэйэлэрин айымньыларыгар туһаналларыгар, киэҥник тарҕанарыгар көмөлөһөллөрүгэр баҕарыылар этилиннилэр.

Күрэс тыла сахалыы буолуохтун!

Петр ПАВЛОВ.