Илларион Федосеевка сүгүрүйүү бэлиэтэ

Саха төрүт көрүҥнэригэр Манчаары XXII оонньууларын чэрчитинэн Таатта биир чулуу уола, сахалартан көҥүл тустууга аан дойду бастакы чемпиона Илларион Федосеевка сүгүрүйүү бэлиэтэ буолла.

Ол курдук, И.Г. Федосеев аатын сүгэр Тааттатааҕы оҕо спортивнай оскуолатын иннигэр кини пааматынньыгар кэриэстэбил уонна сүгүрүйүү бэлиэтинэн, сибэкки дьөрбөтүн ууруу сиэрэ-туома буолла.

Тэрээһиҥҥэ Саха Өрөспүүбүлүкэтин физическэй култуураҕа уонна спорка миниистирэ Леонид Спиридонов, Таатта улууһун дьаһалтатын баһылыга Айаал Бурцев, «Монтажник» тэрилтэ салайааччытын солбуйааччы Руслан Платонов, И.Г. Федосеев чугас доҕотторо, ССРС спордун маастардара Семен Морфунов, Михаил Друзьянов, сиэнэ Дархан Федосеев кыттыыны ыллылар уонна бэйэлэрин истиҥ ахтыыларын оҥордулар.

Бэлиэ түгэҥҥэ, Манчаары оонньууларыгар кэлэ сылдьар спорт бэтэрээннэрин бөлөҕө, оҕо спортивнай оскуолатын үлэһиттэрэ, И.Г. Федосеев оҕолоро, ыччаттара, Ытык Күөл олохтоохторо уонна ыалдьыттара кыттыыны ыллылар. Кинилэр, саха биир чулуу уолун аатыгар, кини талааныгар сүгүрүйэллэрин, ытыктыылларын итиэннэ хаһан даҕаны умнубаттарын биллэрдилэр.

Санатан эттэххэ, улуу тренер Д.П. Коркин иитиллээччитэ Илларион Федосеев 1969 сыллаахха АХШ Боулдер куоратыгар ыытыллыбыт көҥүл тустууга уолаттарга аан дойду бастакы чемпионатыгар 48 киилэҕэ чемпион үрдүк аатын ылбыта. Оттон ити күрэхтэһиигэ иккис киһибит – Семен Макаров 52 киилэҕэ үһүс бириистээх миэстэҕэ тахсыбыта.

Бу, улахан таһымнаах түһүлгэҕэ бастакы ситиһии, саха дьонун-сэргэтин сэргэхсиппитэ, улаханнык үөрдүбүтэ уонна саҥа кыайыыларга кынаттаабыта.

Петр ПАВЛОВ.

Ааптар хаартыскалара.