Куонкурус кыайыылааҕа Евгений Дьячковскай

“Дьулурҕан” хаһыат сайтыгар Россия көҥүл тустууга чемпионатын түмүктэрин сылыктааһыҥҥа куонкурус биллэрбиппитигэр кыайыылааҕынан Евгений Дьячковскай буолла.

Кини уон ыйааһынтан – сэттэ чемпиону таба таайда уонна Константин Капрынов иккис, Александр Авелов үһүс буолалларын чуо харахха эттэ. Онон куонкуруска кыттыбыт дьонноруттан элбэх очукуону хомуйан бастаата. Кыайыылаахтан үгэс быһыытынан, кылгастык бэйэтин билиһиннэрэригэр көрдөстүбүт.

-Намҥа олоробун, үлэлиибин. Көҥүл тустуунан Чурапчыга, спортивнай интернакка олорон дьарыктаммытым, билиҥҥи кэмҥэ хапсагайга дьарыктанабын. Төрөөбүт сирим – Өлүөхүмэ.

Бастаан студенныы сылдьан, 2002 сыллаахха, эмиэ «Дьулурҕан» ыыппыт конкурсугар иккис миэстэ буолбутум, эмиэ тустуу туһунан кинигэ, буклет ылбытым. Билигин конкурстарга биирдэ эмит кыттабын, ол гынан, миэстэҕэ тиксээччим суох.

Бу конкурс үчүгэй бөҕө буоллаҕа, ол эрээри, усулуобуйатын эрдэ соҕус уонна күүскэ рекламалаан ыыттахха, өссө элбэх киһи кыттыа этэ. Итиэннэ өссө спонсордары игин мунньан, үчүгэй бириис туруордахха, өссө элбэх киһи кыттыа этэ. Тустууну ырытар, билэр дьон Саха сиригэр баһаамнар.

Бу кыайбыппар чугас дьонум үөрэн бөҕө буоллаҕа, ордук кэргэним үөрдэ, оҕолорум соһуйан эрэ хааллылар, эмиэ тугу эрэ сүүйдүҥ дуо дэһэллэр.

Евгений “Дьулурҕан” куонкурустарыгар куруук кыттааччы, ол эрэн, бу бастакытын кыайда. Киниэхэ суруналыыс Родион Кривогорницын бэлэмнээн таһаарбыт “История спортивной борьбы Якутии” кинигэтэ туттарылынна. Өссө төгүл кыайыылааҕы эҕэрдэлиибит!

“Дьулурҕан”.