Бары суоллар Ытык Күөлгэ сирдииллэр

Тааттаҕа, күрэс төрүт көрүҥнэригэр Манчаары XXII оонньууларыгар айаннаан кэллибит. Оонньуулар от ыйын 7-12 күннэригэр ыытыллаллар. Күрэс да, сынньатар-сааратар даҕаны тэрээһиннэр элбэхтэр.

Онон “Дьулурҕан” dzulurgan.ru сайтын, телеграмҥа ханаалын t.me/dzulurgan кэтээн көрө сылдьаргытыгар ыҥырабын.

Таатта улууһун сиригэр-уотугар киириигэ, күрэс төрүт көрүҥнэригэр Манчаары XXII оонньууларын бэлэмнээн, тэрийэн ыытааччылар – ыалдьыттары арыылаах алаадьынан, уохтаах кымыһынан күндүлүү, үтүө сырыыга алгыы көрүстүлэр.

Оттон Ытык Күөлгэ киирээт да, биһиги, бэчээт үлэһиттэрэ олохсуйар сирбитигэр – А.Е. Мординов аатынан Таатта лицейыгар тиийдибит. Манна эмиэ дьиэлээхтэр ыалдьыттары эҕэрдэлии көрүстүлэр. Дьэ, бу күннэргэ биһиги манна хонобут, остолобуойга аһыыбыт, пресс кииҥҥэ үлэлиибит.

Арба даҕаны… Билэр дьонум бэҕэһээҥҥиттэн бары Таатта суолун туругун ыйыталаһаллар. Суол үчүгэй диэххэ наада. Биһиги Ытык Күөлгэ өссө балтараа нэдиэлэ анараа өттүгэр Пресс десаҥҥа кэлэ сырыттахпытына, суол өрөмүөнүгэр үлэ бөҕө ыытылла турара.

Оттон бүгүн оонньууларга анаан автобуһунан айаннаан кэллибит. Суол тупсубут, кэҥэтиллибит, тэҥнэммит. Ибиирэн ардаан ылбытын да үрдүнэн, быыллаах. Ханнык даҕаны бадараан, суолга уу суох. Онон куттаммакка эрэ суолгутун Таатта диэки тутуҥ! Бу күннэргэ бары суоллар Ытык Күөлгэ сирдииллэр!

“Дьулурҕан”.