Бөҕөстөрбүт Венгрия түһүлгэтигэр

От ыйын 16-18 күннэригэр Венгрия киин куоратыгар Будапештка, Имре Пойяк, Янош Варга ааттарынан көҥүл тустууга норуоттар икки ардыларынааҕы күрэхтэһии ыытыллар.

Бу, Тустуу аан дойдутааҕы холбоһугун (UWW) төрдүс рейтиннээх күрэхтэһиитэ. Санатан эттэххэ, рейтинг түмүгүнэн бастыҥ бөҕөстөр, балаҕан ыйыгар Загребка (Хорватия) буолар аан дойду чемпионатыгар ыйааһыннарынан сэрэбиэйгэ табыгастаахтык аттарыллан туруоруллуохтара.

Бу түһүлгэҕэ саха тустууга кыһатыттан икки бөҕөс кыттар: Беларусь аатыттан Арыйаан Тютрин 57 киилэҕэ уонна Австралия чиэһин көмүскүүр Георгий Окороков 61 кг ыйааһыҥҥа. Окороков соторутааҕыта Сиднейгэ ыытыллыбыт Австралия чемпионатыгар үһүс төгүлүн чемпионнаата.

Сайаапкаттан көрдөххө, 57 киилэҕэ – Ислам Базарганов (Азербайджан), Петер Хаммер (Коста Рика), Роберт Дингашвили, Лука Гвинджилия (Грузия), Никлас Штехеле (Германия), Рахул Рахул (Индия), Адилет Алмухамедов, Абзал Окенов (Казахстан), Бекзат Алмаз Уулу (Кыргызстан), Сунг Гвонг Ким (Корея), Роман Браво Юнг (Мексика), Бекир Кесер (Турция), Люк Лилледаль (АХШ), Арыйаан Тютрин (Беларусь) бааллар.

Оттон иккис ыйааһыҥҥа: Георгий Окороков (Австралия), Арман Элоян (Франция), Георгий Гониашвили (Грузия), Балаш Рац (Венгрия), Удит Удит (Индия), Такара Суда (Япония), Адил Оспанов, Асылжан Есенгелди (Казахстан), Тайырбек Жумашбек Уулу (Кыргызстан), Дулан Шаувер (Коста Рика), Эмрах Орманоглу (Турция), Сет Гросс (АХШ), Дмитрий Шамела (Беларусь).

Атын даҕаны ыйааһыннарга састаап балачча күүстээх. Японияттан Суда (61 кг), Аояги (70 кг), Такахаши (74 кг), Камия (79 кг), АХШ-тан Карр (74 кг), Хейнс (79 кг), Валенсия (86 кг), Хидлей (92 кг) — күһүн Хорватияҕа ыытыллар аан дойду чемпионатыгар кыттыахтаах бөҕөстөр күөн көрсүөхтэрэ. Кинилэри тэҥэ олимпийскай чемпион Ахмед Тажутдинов (Бахрейн, 97 кг), олимпийскай призердар Ислам Дудаев (Албания, 65 кг), Даурен Куруглиев (Греция, 92 кг), Гиви Мачарашвили (Грузия, 125 кг), Георгий Мешвелдишвили (Азербайджан, 125 кг) тустуохтара.

Биһиги бэйэбит бөҕөстөрбүтүгэр ситиһиилэри баҕарабыт!

Күрэхтэһии тосхоло. Дьокуускай бириэмэтинэн.

От ыйын 16 күнэ, сэрэдэ

01:00-02:00. Бары ыйааһыннарга сэрэбиэй

От ыйын 17 күнэ, чэппиэр

17:30 — 57, 61, 65, 70, 79, 97, 125 кг барыллааһын уонна финалга тахсар иһин хапсыһыылар.

01:00 — 57, 61, 65, 70, 79, 97, 125 кг мэтээл иһин тустуулар.

От ыйын 18 күнэ, бээтинсэ

17:30 — 74, 86, 92 кг барыллааһын уонна финалга тахсар иһин хапсыһыылар.

01:00 — 74, 86, 92 кг мэтээл иһин тустуулар.

“Дьулурҕан”.