Ыстапаан Бөтүрүөп – Ырыа Ыстаапаан бирииһигэр…

Аан дойдуга биллибит «Тойон кыыл», «Мин үрдүбэр күн хаһан да киирбэт» уус-уран киинэлэргэ сүрүн оруоллары толорбут, Ытык киһи Ыстапаан Бөтүрүөп – Ырыа Ыстаапаан 80 сааһын  туолбутунан САДУОБА күрэхтэһиитэ, бэс ыйын 7 күнүгэр Покровскайга Спорт дыбарыаһыгар буолан ааста. 

Улууспут бастыҥ уопсастыбанньыга, этэргэ дылы дуобат диэн баран муннукка ытаабыт тириэньэр Роман Николаевич Васильев көҕүлээһининэн, Хаҥалас улууһун интеллектуальнай оонньууларга федерациятын (бэрэссэдээтэл Р.Д. Кононов, Ю.Д. Яковлев) тэрийиилэринэн, өрөспүүбүлүкэ таһымнаах үс көрүҥнээх САДУОБА (Саахымат, дуобат уонна «Баарыс» хаарты оонньуутугар)  интеллектуальнай оонньуу күрэхтэһиитигэр барыта 40-ча киһи Дьокуускай куораттан, Мэҥэ Хаҥаластан, Амматтан, Тааттаттан, Кэбээйиттэн, хоту Үөһээ Дьааҥыттан, Эдьигээнтэн уонна улууспут нэһилиэктэриттэн түмүстүлэр.

Ааттаах-суоллаах дьонтон, 64 харахтаах нуучча дуобатыгар Аан дойду икки төгүллээх чөмпүйүөнэ, норуоттар икки ардыларынааҕы гроссмейстер Андрей Федотов уонна  Аан дойду үс төгүллээх боруонса призера, норуоттар икки ардыларынааҕы гроссмейстер Николай Гуляев оонньоон, күрэхтэһэн аастылар.

Бу САДУОБА интеллектуальнай оонньууга күүстээх өй, мындыр толкуй наада. Ким эрэ дуобатыгар үчүгэй, сорохтор саахыматтарыгар чулуулар, баарыска – хаарты маатыска тахсыыта быһаарар. Саахымакка уонна дуобакка 10-нуу мүнүүтэ, швейцарскай систиэмэнэн оонньоотулар.

Кыайыылаахтарынан 9 тур түмүгүнэн буоллулар: эр дьоҥҥо тэҥ очукуолаах Хаҥалас улууһуттан Юрий Яковлев уонна Тааттаттан тардыылаах Николай Гуляев, оттон үһүс миэстэни Владимир Слепцов (Үөһээ Дьааҥы) уонна Юрий Винокуров (Хаҥалас) үллэһиннилэр. Дьахталларга кыайыылааҕынан Татьяна Андреева (Хаҥалас) таҕыста. Валентина Прокопьева уонна Галина Мордовская тэҥ очукуолары ыланнар, иккис миэстэҕэ тигистилэр.

Бэтэрээннэргэ Юрий Винокуров (Хаҥалас) бастаата, иккис миэстэҕэ тэҥ очукуолаах Григорий Кычкин (Кэбээйи) уонна Петр Прохоров (Хаҥалас) буоллулар. Эбии Хаҥаластан төрүттээх «Чулуу оонньооччуну» быһаардылар. Манна эрэллээхтик Юрий Яковлев бастаата, иккискэ Юрий Винокуров уонна Петр Прохоров үһүс миэстэни ылла.

Биллиилээх, ытык киһибит Ыстапаан Петров – Ырыа Ыстапаан дьонугар-сэргэтигэр, ити курдук үтүө түгэни бэлэхтээтэ.

Уйбаан УЙГУУРАП.

Хаартыскалар, интеллектуальнай оонньуулар федерацияларын архыыбыттан туһанылыннылар.