Смоленскай көбүөрүттэн 11 мэтээл

Көбүөр маастардарын көҥүл тустууга аһаҕас чемпионаттара ыытыллан түмүктэннэ. Түһүлгэҕэ дойду иһинээҕи бөҕөстөрү тэҥэ Беларусь, Таджикистан, Латвия маастардара кэлэн күөн көрүстүлэр. Саастарынан араарыллыбыт бөлөхтөргө уонна ыйааһыннарга барыта 190 бөҕөс күүһүн холосто.  

Манна даҕатан эттэххэ, бу чемпионат – алтынньы ыйга Татабаньяҕа (Венгрия) ыытыллар бэтэрээннэргэ аан дойду чемпионатыгар сүүмэрдиир сыаллааҕа.

«Дьулурҕан» суруйууларыгар эрдэ иһитиннэрбиппит курдук, бу чемпионакка Саха сириттэн 13 киһи кытынна. Чемпионат биир күнүнэн ыытыллан түмүктэннэ. Биһиги хамаандабытыттан Николай Иванов (С дивизион, 70 кг), Платон Саввинов (В дивизион, 88 кг) уонна Иннокентий Данилов (Ф дивизион, 62 кг) бэйэлэрин ыйааһыннарыгар Россия чемпионун аатын ыллылар.

Оттон Александр Птицын (С дивизион, 70 кг), Алексей Николаев (Д дивизион, 130 кг), Николай Баттахов (Ф дивизион, 100 кг), Вадим Данилов (Е дивизион, 62 кг) – иккис миэстэ, Тимур Андреев (А дивизион, 62 кг), Айаал Павлов (С дивизион, 70 кг), Валериан Неустроев (Г дивизион, 70 кг) уонна Федот Соловьев (Г дивизион, 62 кг) – үһүс буоллулар.

Эдэрдии эрчимнээх аҕам саастаах бөҕөстөрбүтүгэр эҕэрдэ! Эһиги бэйэҕит дьоҥҥутугар-сэргэҕитигэр бачча сааскытыгар диэри чөл олоҕу тутуһуугутунан, тустуунан билигин даҕаны дьарыктанаргытынан, спорка бэриниилээххитинэн үтүө холобур буолаҕыт.

Аны бүгүҥҥүттэн Россия чемпионатын гректии-римнии көрүҥэр күрэхтэһии ыытыллар. Онно эмиэ биһиги бөҕөстөрбүт кыттар буолуохтаахтар. Ситиһиилэри!

«Дьулурҕан».