Саха былыргытын сэҥээрэр дьон бааргыт дуо?

«Манчаары норуот номоҕор», «Саха былыргы сэһэннэрэ уонна кэпсээннэрэ», «Өбүгэлэрбит уонна үөлээннээхтэрбит суолларынан» о.д.а. саха урукку олоҕун туһунан бэртээхэй кинигэлэри аахпатах киһи аҕыйах буолуохтаах. Бу, дьон киэҥ сэҥээриитин ылбыт кинигэлэри Иван Георгиевич Березкин суруйан, дьонугар-сэргэтигэр үйэлээх өйдөбүнньүк оҥорон хаалларбыта.

Бүгүн, бэс ыйын 18 күнүгэр Ем. Ярославскай аатынан история уонна хотугу норуоттар култуураларын холбоһуктаах судаарыстыбаннай түмэллэригэр ӨБҮГЭЛЭРБИТ СУОЛЛАРЫНАН диэн, биллиилээх кыраайы үөрэтээччи, историяны чинчийээччи, онно туһааннаах элбэх кинигэ ааптара Иван Георгиевич БЕРЕЗКИН төрөөбүтэ 110 сылыгар аналлаах быыстапка үөрүүлээхтик аһылынна.

Быыстапкаҕа музей үлэһиттэрэ, Иван Георгиевич ииппит уола, суруйааччы Валентин Егоров, аймахтара, төрөөбүт Уус Алданын улууһун Баатаҕай нэһилиэгин (баһылык М.М. Белолюбскай) бөлөҕө, кыраайы үөрэтээччилэр, куорат олохтоохторо кыттыыны ыллылар.

Манна Ем. Ярославскай аатынан музей архыыбыттан И.Г. Березкиҥҥа сыһыаннаах сэдэх экспонаттар көрдөрүүгэ туруоруллубуттар. Өссө Уус Алдан Баатаҕайыттан Иван Георгиевич олоҕун көрдөрөр докумуоннар, хаартыскалар итиэннэ А.С. Пушкин аатынан Саха сиринээҕи национальнай библиотекатыттан отдел сэбиэдиссэйэ Туйаара Готовцева, биллиилээх биир дойдулааҕа суруйан таһааттарбыт кинигэлэрин көрдөрүүгэ туруорбут.

Биллиилээх археолог Василий Васильевич Попов быыстапка экспонаттарын биир-биир билиһиннэрэригэр ордук, былыргы көмүүлэртэн көстүбүт туос бөҕөхтөр уонна дьахтар оҕуруо киэргэллэрэ – көрөөччүлэр болҕомтолорун тардыахтарын сөбүн эттэ. Итиэннэ музей урукку дириэктэрэ Егор Спиридонович Шишигин, И.Г. Березкин үлэлэрин туһунан кинигэ бэлэмнээбитэ, үп-харчы көстүмүнэ бэчээттэнэ илигин санатта.

Ити курдук, Иван Георгиевич туһунан истиҥ ахтыылар буоллулар. Кини аатын үйэтитэргэ салгыы үлэлииргэ, кинигэлэрин хаттаан бэчээттэтэргэ, дьоҥҥо-сэргэҕэ, ыччаттарга урукку үһүйээннэри, номохтору аныгылыы технологиянан оҥорон сырдатарга санааларын эттилэр.

Быыстапка үлэ чааһын кэмигэр балаҕан ыйыгар диэри туруоҕа. Кэлэн көрүҥ, саха историятын, былыргытын туһунан экспонаттары сэргээҥ.

Петр ПАВЛОВ.

Ааптар хаартыскаҕа түһэриилэрэ.