Сөҕүмэр ситиһии!

Бу күннэргэ, бэс ыйын 27-28 күннэригэр Алдан куоракка штанганы сытан эрэн өрө анньыыга (пауэрлифтинг көрүҥнэриттэн биирдэстэрэ) республика чемпионата буолла. Чемпионат үрдүк таһымҥа тэриллибитин бэлиэтиир тоҕоостоох.

Күрэс кыттааччылары, судьуйалары, көрөөччүлэри барыларын тэҥинэн сөхтөрөр түгэнинэн саха аатырбыт саарына, 78 саастаах Сергей Никифоров сүүс киилэни кыайа тутан, өрө анньыыта буолла. Бу күүс көрдөрүүтэ, бу сааска олох инники өттүгэр саха киһитигэр хатыламмат таһымын билинэн, өйдөөн баар эрэ барыта сүһүөҕэр туран уруйдуур-айхаллыыр түгэнэ өрө ньиргийэн, Сергей Гаврильевич түһүлгэтин кытта бырастыылаһар кэрэ дуорааныгар кубулуйан, дьону-сэргэни уйадытта.

Сергей Гаврильевич 2015 сыл Португалияҕа, 69 сааьыгар 130 киилэни өрө анньан, Аан дойду Аар Дархана буолбута.

2018 сыл 71-р сааһыгар Америкаҕа Аан дойду чемпионатыгар эмиэ 130 киилэни анньан, бэйэтин саастыылаахтарыгар эмиэ Аан дойду Аар Дархана буолар!

Быйыл 78-с сааһыгар Екатеринбург куоракка Россия чемпионатыгар 105 киилэни кыайа тутан, чемпион буолар.

Сергей Гаврильевич эдэр эрдэ5инэ 58-с сааһыгар 160 киилэни өрө анньан, Россия рекордун олохтуур!

Кини бу күүс көрүҥэр спортивнай суолун эргиллэн көрөр буоллахха, кэннигэр  Европа ааттааҕа Алан Эриксон, Россия ааттааҕа Леонид Лохов уонна да атын аан дойду ааттаахтара хаалбыттара.

Сергей Никифоров уһун сыллар тухары, кини сааһыгар аан дойду инники күөнүгэр сылдьар дьоппуон омук күүстээхтэрин кытта иэмэх мастыы эрийистэ. Ол курдук, Имайзуми Харуки 135 киилэни кыайа тутан, Аан дойду муҥутуур рекордун олохтообут буоллаҕына, Сергей Гаврильевич 130 киилэни Аан дойду таһымыгар көрдөрөн инники күөҥҥэ дьоһуннук сэттэ уон саастан үөһэлэргэ элбэх сыллар тухары сырытта.

Маны таһынан саха дьоно билинэр уонна убаастыыр Саарына – Сергей Гаврильевич Саха Республикатын үтүөлээх тутааччыта. Киһи быһыытынан, өй-санаа, билии-көрүү өттүгэр үрдүк таһымнааҕын билинэн, Муҥутуур Россия патриарха Алексий Второй Патриаршай грамотаны туттарбыта.

Кырдьык даҕаны дьиҥ күүстээх дьон сиэринэн, Сергей Гаврильевич олус сэмэй киһи. Кини кыайар ыйааһына – элбэх, анаан эрчиллэр эдэр дьоҥҥо кыаллыбат. Онон кини хаһан да киэн тутта өттөйбөт.

Ыччаты харыстыыр суруллубатах сокуону кэспэтэ, кини чөл туругун, сиэрдээҕин кэпсиир. Алдаҥҥа республика чемпионатыгар Сергей Гаврильевич Никифоровы үрдүк таһымҥа чиэстээбиттэригэр, аатырбыт саха саарына махталын тиэрдэр. Маны таһынан тренеригэр — «Сталь» фитнес кулууп салайааччытыгар Быковников Вячеслав Сергеевичка ис сүрэҕиттэн махтанар.

Антон АДАМОВ.

Хаартыскаҕа: ортоку Сергей Гаврильевич Никифоров.