Оонньуу уота Арыылаах алааһыгар уматыллыа

Ытык Күөлгэ, Таатта улууһугар саха төрүт көрүҥнэригэр XXII Манчаары оонньуулара ыытыллара олох ахсааннаах күннэр хааллылар.

Ол курдук, күрэс сэттэ көрүҥэр: хапсаҕай, мас-рестлинг, хотугу дэгит көрүҥэр, саха дэгит көрүҥэр, гиирэ спордугар, буулдьанан ытыыга уонна остуол оонньуутугар уопсайа 1134 путевка оонньонно. Бу ый ортотугар диэри чэпчэки атлетикаҕа, атах оонньуутугар уонна оҕунан ытыыга 528 путевка оонньонуо.

Бэс ыйын 20 күнүгэр Манчаары Баһылай төрөөбүт-үөскээбит Арыылаах алааһыгар XXII саха төрүт көрүҥнэрин уота үөрүүлээх быһыыга-майгыга уматыллыа. Уот эстафетата Мэҥэ-Хаҥалас, Дьокуускай, Чурапчы, Таатта ытык сирдэринэн сылдьыаҕа. Эстафета уотун делегациятын экстремал-сүүрүүк Дмитрий Горохов салайан илдьэ сылдьыа. Манна алта киһи сүүрүөҕэ: Екатерина Драгунова, Владимир Тордуянов, Владимир Находкин, Александра Мохначевская уонна Марина Дьяконова. Бу дьон бары республика уонна Россия таһымнаах улахан күрэстэр кыайыылаахтара уонна кыттыылаахтара.

Манчаары оонньууларын көрсө Ытык Күөлгэ билигин тутуу, өрөмүөннээһин, улуус киинин тупсарыы үлэтэ, күргүөмнээхтик бара турар. Спорт миниистирин маҥнайгы солбуйааччыта Гаврил Михайлович Мохначевскай салалтатынан уонна Манчаары Баһылай аатынан спорт төрүт көрүҥнэрин сайыннарар киин эппитэтинэстээх үлэһиттэрэ Ытык Күөл сэлиэнньэтигэр күрэс көрүҥнэрэ ыытыллыахтаах баараҕай объектарын тутуутун хаамыытын бэрэбиэркэлээтилэр, спортсменнар, тэрийээччилэр түһэр сирдэрин көрдүлэр-иһиттилэр, ону таһынан олохтоох дьаһалтаны кытта көрсөн сүбэ мунньах тэрийэн кэллилэр.

Бу иннинэ республикатааҕы таһымнаах тэрийэр кэмитиэт улахан сүбэ мунньаҕа буолан ааспыта.

Леонид СПИРИДОНОВ, Саха Республикатын физическэй култуураҕа уонна спорка миниистирэ.