Манчаары оонньуулара Таатта-2025: Бастыҥ ыалдьааччыга бириис оонньонуоҕа

От ыйын 7-12 күннэригэр Ытык Таатта сиригэр күрэс төрүт көрүҥнэригэр Манчаары XXII оонньуулара ыытыллаллара хонон турдах ахсын улам чугаһаан иһэллэр. Быйылгы сыл Саха сиригэр биир улахан таһымнаах тэрээһинэ киэҥ ис хоһоонноох буолуоҕа. Тыҥааһыннаах күрэстэһиини тэҥэ элбэх аралдьытар, сынньатар, култуурунай тэрээһиннэр ыытыллыахтара.  

Ол туһунан Таатта улууһун култуураҕа уонна духуобунай сайдыыга управлениетын начаалынньыга Гаврил Гаврильевич Вырдылин биһиэхэ маннык билиһиннэрдэ:

-Манчаары оонньуутугар от ыйын 7 күнүгэр киэһэ 20:00 чаастан үөрүүлээх аһыллыы генеральнай репетициятын киириитэ босхо буолар. Оттон от ыйын 8 күнүгэр 20:00 чаастан оонньуу үөрүүлээх аһыллыыта уонна сабыллыыта биир билиэтинэн атыыланар. Сыаната 2000-3500 солк.

“Дьулуруйар Ньургун Боотур” стадион 3000 миэстэлээх. Барыта 2000 спортсмен, тэрийээччилэр параадтаан киирэн, трибуна иннигэр ыскамыайкаларга олороллор. Ону таһынан күн аайы стадиоҥҥа тэрээһиннэр буолуохтара – от ыйын 9 кунугэр саха эстрадата, от ыйын 10 кунугэр Россия эстрадата, от ыйын 11 кунугэр – саха эстрадата.

“Саһыл уйалаах” ипподромҥа от ыйын 9 кунугэр официальнай күрэхтэһии, 10-ка коммерческай ат сүүрдүүтэ буолуо. Болҕойуҥ, от ыйын 10 күнүгэр кроссовер массыына көрөөччүлэргэ анаан оонньонуоҕа. От ыйын 10 күнүгэр түүн 00:00 А.Е. Турнин аатынан Күрэс уораҕайын инниттэн күрүгүөмүнэн сүүрүү тэриллиэҕэ. Усунуос 3000 солк. Ити сыанаҕа футболка уонна өйдөбүнньүк мэтээл киирэр. Миэстэлэстэххитинэ өссө мэтээл ылыаххыт. Сигэтэ https://taatta.run. Манна регистрацияланаҕыт.

Ону таһынан 11 күрэс көрүҥэр бастыҥ ыалдьааччы биирдиилээн уонна хамаанданан быһаарыллыаҕа. Кырачааннарга оҕо түһүлгэтэ (күрэхтэһиилэрдээх, бириистэрдээх) пааркаҕа тэриллиэҕэ. Үөрүүлээх аһыллыыга киирэргэ бастыҥ саха таҥастаах дьиэ кэргэҥҥэ улахан бириис баар (“Уран” ювелирнай компания). От ыйын 8-9 куннэригэр пааркаҕа “Манчаары сулустара” айар куонкурус буолар. Күнүстэри кэнсиэр, түүннэри дискотекалар былааннаналлар.

Музейдарбыт, тур-маршруттарбыт Амманан, Алданынан, нэһилиэктэринэн үлэлиэхтэрэ. Быыстапкалар туруохтара, кинигэлэр биһирэмнэрэ буолуохтара. Таатта уустарын уонна иистэнньэҥнэрин уус-уран оҥоһуктара атыыланыаҕа.

Онон күндү дьоммут – Дойдуга тапталынан сирдэтэн, аһыллыыга, массовкаҕа бары көхтөөхтүк кыттыҥ! Бары тэрээһиннэри көмөлөөммүт, үрдүк таһымнаахтык ыытыахпыт диэн эрэнэбит.

PS: Экспресс-интервью видеотын “Дьулурҕан” хаһыат телеграмҥа ханаалыгар t.me/dzulurgan көрүөххүтүн сөп.

«Дьулурҕан».