Ким билгэлээһинэ сөп эбитий?

Көҥүл тустууга Россия чемпионатын көрсө үгэс быһыытынан «Дьулурҕан», спорду сэҥээрээччилэргэ анаан, чемпионат кыайыылаахтарын билгэлээһиҥҥэ куонкурус тэрийдэ. Куонкуруска барыта 24 киһи бэйэтин сылыктааһынын ыытта. Кинилэргэ барыларыгар махтанабыт!

Санатан эттэххэ, кинилэр ыйааһыннарынан кыайыылаахтары уонна саха бөҕөстөрүттэн кимнээх мэтээлгэ тиксэллэрин билгэлээтилэр. Дьэ, туох-хайдах буоларын көбүөр көрдөрүө.

Кинилэр ортолоругар Эрхан Константинов, Андрей Александров, Иван Барашков, Айсен Молуков, Егор Бурцев, Сергей Лукин, Иван Рожин, Данил Данилов курдук, «Дьулурҕан» хаһыат араас сылларга тэрийбит куонкурсун кыайыылаахтара бааллар. Онон, күрэс тылынан эттэххэ, састаап күүстээх диэххэ сөп. Бары даҕаны тустууну үчүгэйдик сыныйан кэтээн көрөр, элбэҕи билэр-көрөр, үөрүйэхтээх дьон.

Быйыл «Дьулурҕан» хаһыат бэчээттэнэн тахса турара 25-с, үбүлүөйдээх сыла. Ол тухары ааҕааччыларга анаан күрэскэ сыһыаннаах элбэх куонкурустар тэриллэн, кыайыылаахтарга анал бириистэр туттарылыннылар.      

Ким билгэлээһинэ сөп эбитий? Ону өйүүн билиэхпит. Аны, чемпионат түмүгүн кэтэһэбит. Итиэннэ киирбит сылыктааһыннары тэҥнээн, кыайыылааҕы быһаарыахпыт. Биһиги куонкуруспут – дьэҥкэ. Хаһан баҕарар буоларыныы, хас биирдии кыттааччы сайтка киирэн, ким хайдах билгэлээбитин көрөн, бэйэтэ ырытар, сыаналыыр кыахтаах. Тэҥнэһии түгэнигэр ким бэйэтин эппиэтин урут ыыппыт – ол барыстаах буолар.

«Дьулурҕан».