Гректии-римнии тустууга үс чемпионнаахпыт

Смоленскай куоракка көбүөр маастардарын тустууга Россия аһаҕас чемпионаттара түмүктэннэ. Манна бастаан көҥүл тустууга, оттон гректии-римнии тустууга саастарынан араарыллыбыт бөлөхтөргө ыйааһыннарынан ким күүстээҕин быһаарыстылар.

Санатан эттэххэ, көҥүл тустууга биһиги бөҕөстөрбүт 3 кыһыл көмүс, 4 үрүҥ көмүс уонна 4 боруонса мэтээли ылбыттара. Николай Иванов, Платон Саввинов, Иннокентий Данилов бэйэлэрин ыйааһыннарыгар чемпионнаабыттара.

Оттон гректии-римнии тустууга аан дойду чемпионатын призёра Алексей Николаев Д дивизиоҥҥа (о.а. 51-55 саастаахтарга) 130 киилэҕэ тэҥнээҕин булбата. Эмиэ Россия чемпиона, аан дойду чемпионатын көҥүл тустууга призёра Вадим Данилов Е дивизиоҥҥа (56-60 саастаахтарга) 62 кг ыйааһыҥҥа бастакы миэстэҕэ таҕыста. Ити курдук, Николай Баттахов Ф дивизиоҥҥа (61-66 саастаахтарга) 130 киилэҕэ чемпионнаата.

Оттон Тимур Андреев (62 кг), Александр Птицын (70 кг), Иннокентий Данилов (62 кг) иккис, Валериан Неустроев (70 кг) үһүс миэстэ буоллулар.

Онон мэтээлгэ тиксибит тустууктарбыт, аны күһүн Венгрияҕа ыытыллар аан дойду чемпионатыгар Россия сүүмэрдэммит хамаандатыттан кыттарга кыахтаннылар. Манна диэн эттэххэ, бөҕөстөрбүт Смоленскайга сүрүннээн көҥүл тустууга кытта тиийэн баран, биир сырыы оҥорон гректии-римнии тустууга күүстэрин холоһон, үчүгэй көрдөрүүнү ситиспиттэрин санатар тоҕоостоох.

Эдэрдии эрчимнээх бөҕөстөрбүтүгэр эҕэрдэ! Кинилэр маннык үрдүк ситиһиилэринэн атыттарга үтүө холобуру көрдөрөллөр. Аны бэс ыйын бүтүүтэ эр дьоммут көҥүл тустууга Россия үрдүнэн бастыыр иһин чемпионаттарын кэтэһэбит.

«Дьулурҕан».