Экспедиция сыала Албан ааттаах эһэлэргэ сүгүрүйүү, улуус историятын билсии

Уус Алдан оройуонун Окоемовка сүрүн оскуолатын историяҕа учуутала Геннадий Пестряков араас оскуолалартан оҕолору мунньан улууспут нэһилиэктэринэн экспедиция тэрийбитэ уонча сыл буолла. Онно атын улуустартан эмиэ кэлээччилэр.

Быйыл экспедиция II Лөгөй, Өнөр, Дүпсүн нэһилиэктэринэн айаннаата уонна Кыайыы 80 сылыгар ананан “Сүгүрүйүү эстафетата” диэн ааттанна. Манна үс улуустан 12 оҕону кытта үс учуутал чылдьаллар. Кинилэр бу нэһилиэктэр Аҕа дойдуну көмүскүүр сэриигэ кыттыыларын, историяларын билсиэхтэрэ.

Экспедиция бэс ыйын 7 күнүттэн Тойон Мүрү биир ытык сириттэн Хараҕа Төрдүттэн саҕаланна. Манна оҕолору улуус бэтэрээннэрин Сэбиэтин бэрэссэдээтэлэ Олег Федоров уонна улуустааҕы түмэл исписэлииһэ Александр Сивцев эҕэрдэлээн, элбэҕи билэн-көрөн кэлэллэригэр баҕа санааларын этэн атаардылар.

Бастакы күн II Лөгөй нэһилиэгэр кинилэри кыраайы үөрэтээччи, нэһилиэк түмэлин үлэһитэ Федот Бысыин көрсөн оҕолорго Тулуна бөһүөлэгин устун кэрийэ сылдьан нэһилиэк былыргыттан билиҥҥэ диэри историятын сиһилии кэпсээтэ. Манна оҕолор история биир ураты кэрэһитин, XIX үйэ бүтүүтүгэр Бороҕон улууһугар кулубалаан олорбут Степан Васильев – Кылыкынай ампаарын көрдүлэр, кини туһунан кэпсээни иһиттилэр.

Иккис күн оҕолору Өнөр нэһилиэгэр аатырар Өнөр эбэтин таһыгар таһыгар оскуола дириэктэрэ Петр Сыроватскай уонна нэһилиэк историятын үөрэтээччи Афанасий Черноградскай көрсөннөр, Тыгын Тойону умсугуппут Эбэ туһунан кэпсээтилэр. Ол кэнниттэн сахалартан бастакынан Россия Дьоруойун аатын ылбыт Михаил Стрекаловскай түмэлигэр сылдьаннар история учуутала Саргылаана Осодоева экспедиция кыттыылаахтарыгар Михаил Михайловиһи уонна нэһилиэк Аҕа дойду сэриитигэр кыттыытын туһунан элбэҕи иһиттилэр, биллилэр.

Салгыы Дүпсүн нэһилиэгэр тиийэн номоххо ахтыллар Күтүр Эмээхсин олоҕор Бөрөлөөх алааска тохтоон нэһилиэк былыргытын билистилэр. Онтон аны Остуойка учаастагар тиийэннэр, урукку Дүпсүн улууһун саамай суруҕырар, баай Афанасьевтар туттарбыт ампаардарын сөҕө махтайа көрдүлэр. Оҕолор бүгүн Дүпсүн бөһүөлэгэр тиийдилэр. Бу уруккута Дүпсүн улууһун киинэ буолан турбут ытык сир бэлиэ сирдэрин көрүҕөхтэрэ-истиэхтэрэ.

Маннык айаннар оҕону төрөөбүт дойдуга бэриниилээх буолууга, историяны билэ-көрө сатыыр баҕаларын уһугуннарарга олус туһалаахтар. Ол эрээри, бу сыллар тухары экспедиция айанын улуус үөрэҕин салалтата өйөөбөтөҕө хомолтолоох. Айан сыл аайы Геннадий Дмитриевич тус бэйэтин уонна Окоемовка сүрүн оскуолатын кэлэктиибин баҕаларынан тэриллэр.

Афанасий Копырин.