Дыгын оонньуута-2025: Ким кимниин киирсэрэ билиннэ

Саха сиринээҕи “Медиа кииҥҥэ”, буолаары турар Дыгын оонньууларын иннинэ пресс-конференция тэрилиннэ. Манна Дыгын оонньуутун кыттыылаахтара, кинилэр тренердэрэ, тэрийээччилэр уонна суруналыыстар муһуннулар.

Тэрээһини Дьокуускай куорат спорка управлениетын начаалынньыга Эдуард Ефимов салайан ыытта. Бастакынан кини тылы Саха сирин физическэй култуураҕа уонна спорка министрэ Леонид Спиридоновка биэрдэ. Леонид Николаевич, мустубут дьону Үрүҥ тунах ыһыахтарынан эҕэрдэлээн туран, быйылгы Дыгын оонньуутун кыттыылаахтарыгар ситиһиилээх күрэхтэһиини баҕарда. Ким үчүгэй бэлэмнээх, ким кыайыыга дьулуурдаах – ол кыайдын диэтэ. Бириистэр даҕаны баһырхайдар.

Бу күн, Дыгын оонньууларын быйылгы муҥутуур кыайыылааҕын наҕараадатын – үрүҥ көмүстэн чочуллан оҥоһуллубут мэтээли уонна анал бэлиэни анаан көрдөрүүгэ туруордулар. Чахчы сиэдэрэй оҥоһуулаах мэтээл. Дьэ, бэс ыйын 29 күнүгэр бу мэтээли ким кэтэн, түөһүгэр күлүмүрдэтэ оонньотуой?

Алтыс сылын Дыгын оонньуутугар үп-харчы өттүнэн күүс-көмө, өйөбүл буолар Алексей Семенович Пинигин (“Прогресс” тэрилтэ), былырыын эрэннэрбитин курдук, бу да сырыыга кыайыылаахха ботуччу бирииһи туруорарын эттэ, сахалар төрүт көрүҥнэрбит сайдан иһэллэригэр, онуоха бары көмө буоларбытыгар ыҥырда. Санатан эттэххэ, сахалыы төрүт көрүҥнэргэ күрэскэ былырыын барыта 16 күрэхтэһии ыытыллыбыт.

Тэрээһин кэмигэр уолаттарга, «Бэргэн оонньуулара» диэн сахалыы дэгит күрэс кыттыылаахтарын сэрэбиэйэ буолла.

Дыгын оонньуутун сүрүн судьуйата Иван Горохов, бастатан туран, күрэхтэһии тосхолун билиһиннэрдэ. Ол курдук, быйылгы Дыгын оонньуулара субуотаҕа күнүс 15:00 чаастан Үс төгүл үс көрүҥтэн саҕаланарын, ол иннинэ 14 ч. 30 мүн. күрэхтэһиини үөрүүлээхтик аһыы буоларын билиһиннэрдэ. Сарсыныгар өрөбүлгэ күрэхтэһии күнүс 12:00 чаастан буоларын эттэ.

Ол кэнниттэн, Дыгын оонньууларын биирдиилээн көрүҥнэринэн быраабыланы быһаарсыы буолла. Манна кыттыахтаах боотурдар уонна кинилэр тренердэрэ көхтөөхтүк кыттан, санааларын үлэһиннилэр. Дьэ оттон, биирдиилээн көрүҥнэринэн сэрэбиэй тардыыта буолла. Боотурдар бастаан утаа, ким кими кытта киирсэллэрин биллилэр.

Биллэрин курдук, быйылгы Дыгын оонньуулара отутус сылын ыытыллар, онон үбүлүөйдээх, кэрэ бэлиэ түгэн диэххэ сөп. Дыгын оонньуутун биир спонсора – «Тэтим» тэрилтэ боотурдарга барыларыгар анал таҥастары үөрүүлээх быһыыга-майгыга туттарда.

Дыгын оонньуутугар курэс былдьаһыахтара: Валентин Афанасьев (Боотур СК, Ньурба), Тимофей Большаков (Сунтаар), Айсен Ботуев (Үөһээ Бүлүү), Яков Дмитриев, Артем Дьяконов (иккиэн Кэбээйи), Вячеслав Дьяконов (Нам), Алексей Ефимов (Боотур СК, Муома), Николай Матаннанов (Боотур СК, Таатта), Александр Пшенников (Өлүөхүмэ), Борис Сдвижков (Амма), Алексей Созонов (Орто Халыма), Алексей Соколов (Боотур СК, Сунтаар), Иван Степанов (Дьокуускай), Борис Строев (Чурапчы), Алексей Уваровскай (Кэбээйи), Владимир Шологонов (Үөһээ Бүлүү). Бары даҕаны тэҥ баайыылаах боотурдар. Дьэ, хайалара кыайар?

Онон, тэрийээччилэр эппиттэрин курдук, бүгүҥҥүттэн Дыгын оонньуулара саҕаланнылар.

PS: Дыгын оонньуутун туһунан эбии сонуннары “Дьулурҕан” телеграмҥа ханаалыгар t.me/dzulurgan көрөргүтүгэр баҕарабын.

Петр ПАВЛОВ.

Ааптар хаартыскаҕа түһэриитэ.