«Дьулурҕан» куонкурсун кыайыылааҕынан ким буолла?

Олохсуйбут үгэс быһыытынан, Саха сирин тустууну таптааччыларыгар анаан Россия көҥүл тустууга чемпионатыгар сыһыаннаах куонкурус тэрийэн ыыттыбыт. Куонкуруска, тустууну сыныйан кэтээн көрө, билэ-сатыыр дьон кытыннылар.

Ол курдук, эр дьоҥҥо хас биирдии ыйааһыҥҥа кыайыылаахтары сөпкө таайыы иһин 1-дии, саха бөҕөстөрүттэн ким хаһыс миэстэни ыларын сөпкө сылыктааһын иһин 2-лии очукуо ааҕылынна.

Түмүккэ, кыайыылааҕынан, бэйэтин билгэлээһинин 18-с киһинэн ыыппыт Евгений Дьячковскай буолла. Кини – 57 кг Мехтиханов, 61 кг Угуев, 65 кг Ибрагимов, 79 кг Усманов, 86 кг Кадиев, 97 кг Садулаев уонна 125 кг Курбанов чемпионнуулларын сөпкө суруйбут (7 очукуо). Ону тэҥэ, саха бөҕөстөрүттэн Константин Капрынов иккис, Александр Авелов үһүс миэстэ буолалларын чуо харахха эппит (4 очукуо).

Атыттар хайдах кытыннылар диэтэххэ, Валерий 9, Иван Иванов, Сергей Лукин, Данил Данилов 8-тыы очукуону хомуйан, куһаҕана суох көрдөрүүлэннилэр. Оттон Николай Константинов уонна Егор Бурцев сэттэлии чемпиону таба таайбыттарын бэлиэтиир оруннаах.

Кыайыылаах Евгений Дьячковскайы эҕэрдэлиибит! Бу күннэргэ киниэхэ бирииһэ туттарыллыа уонна интервью ылыллыа.

Аны маннык куонкурус күһүн, көҥүл тустууга аан дойду чемпионатыгар анаан ыытыллар. Тустуу бэриниилээх ыалдьааччылара билиҥҥиттэн хамаандалар састааптарын үөрэтэ, ырыта, бэлэмнэнэ сылдьыҥ.

«Дьулурҕан».