Болҕойуҥ, “Бэргэн оонньуулара”

Үс Хатыҥҥа, Туймаада ыһыаҕын чэрчитинэн «Бэргэн оонньуулара” диэн, 2007-2008 с. төрөөбүт уолаттар Дьокуускайдааҕы үүт собуотун бирииһигэр сахалыы дэгит күрэскэ быһаарыылаах күрэхтэһиилэрэ буолуоҕа.

Күрэхтэһиигэ аҕыс бастыҥ көрдөрүүлээх эдэр боотурдар анал сүүмэрдээһини ааһан кытталлар. Ол курдук, Дмитрий Федоров (Нам), Саян Макаров (Дьокуускай), Даниель Гуляев (Кэбээйи), Саид Дмитриев, Даниил Слепцов, Владимир Ксенофонтов, Геннадий Пак, Геннадий Васильев (бары Мэҥэ Хаҥаластан) күрэс былдьаһыахтара. Ким хаһыс нүөмэринэн, кими кытта кыттара номнуо сэрэбиэйдээһиҥҥэ быһаарыллан турар.

Инники эрэллэрбит күрэс биэс көрүҥэр: ыстаныыга, тутум эргииригэр, мас тардыьыыга, сүүрүүгэ уонна хапсаҕайга ким бастыҥын быһаарсыахтара. Дьэ, Дыгын оонньуутуттан туох даҕаны итэҕэһэ суох тыҥааһыннаах уонна күүрээннээх күрэхтэһии буолара күүтүллэр. Муҥутуур кыайыылаах сүрүн бирииһэ — мотоцикл.

“Бэргэн оонньуулара” субуотаҕа сарсыарда 10:00 чаастан саҕаланаллар.

Петр ПАВЛОВ.

Ааптар хаартыскаҕа түһэриитэ.