Барыта Манчаары оонньууларыгар ананна

Күрэс туһунан сахалыы сырдатар «Дьулурҕан» хаһыат саҥа нүөмэрэ аҕыс балаһанан, барыта, Тааттаҕа буолаары турар Манчаары оонньууларыгар ананан күн сирин көрдө.

Манна эһиги бэлэмнэнии хаамыытын, Манчаары спартакиадатын историятын (П.Павлов), оонньуу уотун эстафетатын хайысхатын, Ытык Күөлгэ саҥа үлэҕэ киирэр Күрэс уораҕайыгар аата иҥэриллибит Алексей Егорович Турнин диэн кимин (А.Мурунов), күрэс бу улахан түһүлгэтин төрүттээбит Афанасий Егорович Алексеев туһунан (М.Друзьянов), Манчаары оонньууларын дириэксийэтин салайааччы Петр Егорович Захаровы кытта сэһэргэһиини (В.Канаева), суруналыыстар Тааттаҕа сырыыларыттан бэлиэтээһини (П.Павлов), о.д.а. балаһаларынан киэҥ ис хоһоонноох суруйуулары ааҕыаххытын сөп.

Ону тэҥэ хаһыакка, күрэс төрүт көрүҥнэригэр Манчаары XXII оонньууларын күрэхтэһиилэрин уонна култуураҕа тэрээһиннэрин күннэринэн тосхоллоро (бырагыраамалара) бэчээттэннилэр. Онон “Дьулурҕан” бу анал таһаарыыта – спорду таптааччыларга ыйынньык буоларыгар баҕарабыт.

Хаһыаты “Горпечать” киоскаларыттан ылыаххытын сөп. “Дьулурҕан” – “Забота-Арчы” хаһыакка сыһыарыы быһыытынан бэчээттэнэн тахсар.

Саха сиригэр күрэс туһунан соҕотох «Дьулурҕан» хаһыаты сэҥээриҥ, «Дьулурҕаны» ааҕыҥ, «Дьулурҕанныын» бииргэ буолуҥ!

“Дьулурҕан”.