Аан дойду чөмпүйүөнүгэр тиийэ үүммүтэ

Быйыл Тааттаҕа XXII “Манчаары оонньуулара” ыытыллар. Бу оонньууларга саха төрүт көрүҥнэригэр күрэстэһэллэр. Мин Манчаарыга мас тардыһыытын көрүҥэр кыттар, Туйара Орлова туһунан билиһиннэриэм.

Кини Таатта улууһун Баайаҕатыттан төрүттээх. Оскуоланы 1991 сыллаахха  бүтэрбит. Оскуолаҕа сылдьан волейболунан, баскетболунан, сүүрүүнэн уонна ыстаҥанан сөбүлээн дьарыктаммыт. Успуорт эйгэтигэр такайбыт учууталынан алын кылаастарга Константин Петрович Никифоров, оттон улахан кылаастарга Софья  Григорьевна Сидорова буолаллар. Сөбүлүүр уруоктарынан физкултуура, математика уонна черчения эбиттэр. Оҕо сылдьан сүүрэн-көтөн, кыыс-уол диэн арахсыбакка, лаптаттан саҕалаан хоккейга тиийэ оонньууллар эбит.

Комсомуол төрүттэммитэ 70 сылыгар, 1988 с. комсомуол кэккэтигэр киирбит. Туйара оҕо билиитэ-көрүүтэ кэҥииригэр хаһыат оруолу ыларын өйдөөн, “Бэлэм буол” хаһыаты о.д.а хаһыаттары ааҕа улааппыт. Оттон кинигэни ааҕарга, бииргэ үөрэнэр уола Володя Макаров холобур буолбут. Итинтэн ыла утуйарыгар кытта кинигэни ааҕар буолбут. Туйара оскуолатын ситиһиилээхтик бүтэрэн, 2002 с. Чурапчы институтугар үөрэнэ киирбит. Үөрэххэ киирбит сылыгар оскуолаҕа физкултуура учууталынан үлэлэтин саҕалаабыт.  Баҕа санаатынан 2007 сылтан мас тардыһыынан утумнаахтык дьарыктаммыт. Төрөөбүт улууһун хамаандатыттан кыттан, кыайыылаах тахсыбыт. Биллэр-көстөр ыспарсымыан быһыытынан бииртэн-биир кыайыыны ситиһэн, өрөспүүбүлүкэҕэ чөмпүйүөннээбит, Санкт-Петербурга ыытыллыбыт дойду чөмпүйэнээтигэр иккис буолары ситиспит. “Манчаары оонньууларыгар” Бүлүүгэ (2009 с.) кыайбыт, Үөһээ Бүлүүгэ (2017 с.) – иккис миэстэни ылбыт. Кыайыыттан кыйыылар кэлэннэр, кини мас тардыһыытыгар Аан дойду түөрт төгүллээх, Арассыыйа чөмпүйэнээтин икки төгүллээх, Арассыыйа икки төгүллээх муҥутуур чөмпүйүөнэ, Америкаҕа ыытыллыбыт Аан дойду чөмпүйэнээтин иккис призера, Аан дойду Кубогын хаһаайката, өрөспүүбүлүкэ үс төгүллээх чөмпүйүөнэ о.д.а. Арассыыйа, Саха сирин мас тардыһыытыгар успуорт маастара буолар. Маннык кыайыы элбэх дьарыктан, күүстээх санааттан ситиһиллэр.

Күн бүгүн Туйара Ивановна XXII “Манчаары оонньууларыгар” кыттарга бэлэмнэнэр. Таатта улууһун дьаһылтатыгар Анал байыаннай дьайыыга сылдьар биир дойдулаахтарбытыгар, кинилэр төрөппүттэригэр көмөлөһөр салаа специалиһынан үлэлиир. Буойуттарбытыгар ас-үөл, мас-сал хомуйуутун салайар, сиэккэлэри оҥоруу тэрийээччитэ буолар.

Туйара Ивановнаҕа “Манчаары оонньууларыгар” ситиһиини, кыайыыны баҕарабын.

Айхаана КОРНИЛОВА, Алампа аатынан Ытык Күөл 1-кы нүөмэрдээх орто оскуолатын үөрэнээччитэ.

Таатта.