Улуу Кыайыы үбүлүөйдээх 80 сылынан!

Саха Өрөспүүбүлүкэтин Физическэй култуураҕа уонна успуорка министиэристибэтэ 2025 сыл устатын тухары ыытыллар бука бары тэрээһиннэри Аҕа дойду Улуу сэриитигэр Кыайыы 80 сылыгар аныыр.

Маны таһынан, кыайыы былааҕын эстафетатыгар, кылаас чаастарга, успуорт күрэхтэһиилэригэр уонна үгүс киһи биһирэбилин ылбыт «Вальс Победы» аахсыйаҕа уонна да атын тэрээһиннэргэ биһиги биир идэлээхтэрбит ис сүрэхтэриттэн көхтөөх кыттыыны ыла сылдьаллар.

Дьокуускайга ыам ыйын 2 күнүгэр, Аҕа дойду уоттаах сэриитин, үлэ уонна успуорт бэтэрээнин, 101 саастаах ытык кырдьаҕас Наум Слепцов аатынан саахымат-дуобат турнира 14-с төгүлүн «Кыайыы 50 сыла» Успуорт дыбарыаһыгар ыытылынна. Бу түһүлгэҕэ оҕолор уонна кырдьаҕастар түмсэн илин-кэлин түсүһүүлэригэр аҕа саастаах спортсменнар кыайыы өрөгөйүн билэн үөрдүлэр-көттүлэр.

Бу күрэс иннинэ Наум Трифонович дьиэтигэр ыалдьыттаан, ытык кырдьаҕас мындыр сүбэтин-аматын ылынан, кини баҕа санаатын истэн сүргэбит олуһун диэн көтөҕүллүбүтэ. Наум Трифонович билигин даҕаны күҥҥэ үстэ сэрээккэлиир уонна өйүгэр саахмат-дуобат партияларын оҥорон көрөн оонньуур эбит. Бу курдук этин-сиинин, мэйиитин эрчийэр буолан, бэрт тэтиэнэх сылдьар, уруккуну-хойуккуну өйдүүрэ сөхтөрөр. Уһун үйэлэнии кистэлэҥэ – успуорт уонна үлэ диэн этэр кини.

Бука бары биир дойдулаахтарбын, Аҕа дойду сэриитигэр дойду көмүскэлигэр турбут бэтэрээннэри, тыылга Кыайыыны уһансыбыт дьоммутун уонна сэрии сылларын оҕолорун Улуу Кыайыы үбүлүөйдээх 80 сылынан итиитик-истиҥник эҕэрдэлиибин! Бука барыгытынар чөл туругу, кытаанах доруобуйаны уонна ситиһиилэри баҕарабын!

Бары үчүгэйи кытта Леонид СПИРИДОНОВ, Саха сирин физическэй култуураҕа уонна успуорка миниистирэ.