Оскуолабытыгар патриотическай иитиигэ биир сүрүн хайысха

Быйыл Аан дойду иккис уоттаах сэриитэ түмүктэммитэ үбүлүөйдээх 80 сылын туолар. Улахан чаҕылхай тэрээһин буолаары турар. Хас күн аайы Айыы Кыһатын оҕолоро бэлэмнэниигэ кытталлар. Ол эрэн маннык таһымнаах, умнуллубат тэрээһиҥҥэ хапсар олус уустук.

Биһиги гимназиябыт строевой хаамыга биир көхтөөх хамаандата – 8 “г” кылаас хамаандата буолар. Бэһис кылаастан дьарыктанан, оскуола иһинэн кыайаллар. Хас биирдии оҕо кылаас олоҕор болҕомтотун ууран, ис сүрэхтэриттэн кыһаллан элбэх ситиһиилэри оскуолабытыгар аҕалаллар. Кытаанах бэлэмнэниини ааһан, куораттааҕы таһымҥа тахсан кыттан ситиһиилэнэн барыбытын үөрдэллэр. Кинилэр биир киһи курдук хомуллуулаахтарынан киэн туттабыт, астынабыт.

Сергеев Дархан, Айыы кыһатын 8 «г» кылааһын дьулуурдаах хамандыыра, “Бастыҥ хамандыыр» аат кыайыылааҕа:

-Мин үһүс кылаастан саҕалаан взвод хамандыыра буолабын, командир буолар үчүгэй, интэриэһинэй. Кылааспытыгар 31 буолан үөрэнэбит. Үһүс кылаастан оскуола иһинэн ыытыллар араас тэрээһиннэргэ кыттабыт, биһиги быйыл Губинскай уокурук күрэҕэр кыайаммыт, куорат оскуолаларын икки ардыларыгар байыаннай хаамыы, ырыа көрүүтүгэр үһүс миэстэ буоллубут. Ол иһин Кыайыы 80 сылын көрсөр парадка кыттар чиэскэ тигистибит. Онтон олус үөрэбин. Бэлэмнэнии этэҥҥэ, көхтөөхтүк ааһар. Учууталларбар Сокольникова Елена Васильевнаҕа, Черноградскай Иван Петровичка уонна кылааһым салайааччытыгар Седалищева Антонина Васильевнаҕа түгэнинэн туһанан махтаныа этибит!

Седалищева Антонина Васильевна 8 “г” кылаас салайааччыта:

-Саҥа хомуллан оҥоһуллубут 34 оҕолоох бэһис кылаастары биэрбиттэрэ. Аҥардара Айыы Кыһата, аҥардара куорат, улуус уонна атын оскуолаттан хомуллубут оҕолор этилэр. Сылын аайы оскуолабытыгар буолар көрүүгэ “Смотр  песни и строя” үгэс быһыытынан бэһис кылаастан кыттабыт. Төрдүс, бэһис  кылаастар икки ардыларыгар бастакы миэстэ буолбуппут. Онно физкультурабыт учуутала Сокольникова Е. В., Сергеев Ньургун (кылааспыт убайа табаарыһынаан), бэйэм солбуйса сылдьан дьарыктаабыппыт. Ол сыл окружной көрүүгэ баран кыайан-хотон кэлбиппит. Оттон ыла 6-7-8 кылааска уокурук күрэҕэр сыллата бастыыбыт. Бэһис кылааска окружнойга кыайан, Кыайыы күнүн тэрээһинигэр сылдьыбыппыт. “Свеча памяти” Кыайыы болуоссатыгар ветераннары, ыалдьыттары арыаллаабыппыт, бастакынан чүмэчилэри уурбуппут. Быйыл куорат көрүүтүгэр “смотр песни и строя” дьэ кыттан, үһүс миэстэ буолбуппут.

Хас да оҕо байыаннай, правоохранительнай эйгэҕэ үлэлии барар баҕалаахтар, (юрист, адвокат, МЧС, МВД). Оҕолорбор хаамыы күрэҕин кэмнэригэр куруук этэбин: “Вы будете служить, защищать, кто-то выберет эту сферу как основной, армияҕа барыаххыт, үчүгэйдик дьарыктанын, хаамыҥ”, – диэн.

Биир дьыала түмэр. Оҕолор наадалаах кэмҥэ хомуллаллар, олус түмсүүлээхтэр. Эттэххэ сүбэни, критиканы ылыналлар. Бэйэ-бэйэлэрин көрүнэллэр, бэриллибит дьыалаҕа ээл-дээл сыһыаннаспаттар. Быйыл куорат строевой кэмигэр оҕолор барахсаттар төһө да ыарыйдаллар оскуолабыт, уокурукпут туһугар диэн дьарыкка, күрэххэ бары кэлбиттэрэ. Өссө да куоракка кыттыахтарын, быйылгы көрдөрүүлэрин тупсарыахтарын баҕараллар. Аныгыскы сылга тохсус кылаас буолаллар, эксээмэн туттараллар, ол иһин хайдах буолара биллибэт. Онус, уон биирис  кылааска диэри тута сылдьыбыт дьарыкпытын бырахпат инибит, диэн баҕалаахпыт. Бачча сыллар тухары дьарыктанан, ситиһиилэнэн кэлэн баран, салгыы да киирсэр санаа баар.

Төрөппүттэрбитин кытта биир санаанан үлэлиибит, оҕолорбут таҥастарын-саптарын барытын кинилэр хааччыйаллар. Физкультурабыт учууталыгар Сокольникова Елена Васильевнаҕа махтал, оҕолорбутугар дьарыктанан, түмүллэн, настройкаланан кыттаннар, ситиһиилээхтэр. Уонна махтаныам этэ оскуолабыт 10 в кылааһын үөрэнээччилэригэр, кинилэр быйылгы күрэхтэргэ кыттарбытыгар, күүс-көмө, сүбэ-ама биэрэн тэҥҥэ көмөлөспүттэригэр. Ол курдук онус кылаас командирыгар Артем Ивановка, юнармеецтарга Никита Дьяконовка, Алиса Простаковаҕа, Ли-Фу Юляҕа.

Ахсыс «г» кылаас оҕолоругар өссө даҕаны ситиһиини, баҕарабыт тулууру, кытаанах санааны! Оскуолабыт аатын ааттата туруҥ!

Суруйдулар, Айыы Кыһатын үөрэнээччилэрэ Неустроева Сандаара, Андросова Тая.