Бөҕөстөрбүт Монголия көбүөрүгэр

Монголия киин куоратыгар Улан-Баторга, Тустуу аан дойдутааҕы холбоһугун (UWW) спортивнай тустууга үһүс рейтиннээх күрэхтэһиитэ саҕаланна.

Торум быһыытынан бастаан гректии-римнии тустааччылар көбүөргэ таҕыстылар. Оттон салгыы дьахталлар тустуулара буолар. Эр дьон көҥүл тустууга күрэхтэһиитэ ыам ыйын 31 – бэс ыйын 1 күннэригэр ыытыллар.

Эрдэ биллэриллибитин курдук, саха тустууга кыһатыттан бу түһүлгэҕэ быйылгы И.Ярыгин аатынан күрэхтэһиигэ миэстэлэспит Лев Павлов (57 кг) уонна Константин Капрынов (70 кг) – Россия сүүмэрдэммит хамаандатын састаабыгар киирэн кытталлар. Үһүс кыттааччыбыт – Австралия чемпиона, олимпиец Георгий Окороков. Кини 61 киилэҕэ тустар.

Бүгүн ыйааһыннарынан сэрэбиэй оҥоһулунна. Ону кылгастык билиһиннэрдэххэ маннык:

57 киилэҕэ барыта уон кыттааччы баар. Монголияттан, Индияттан, Кыргызстантан иккилии киһи уонна Россия, Мексика, Турция бөҕөстөрө. Омос көрдөххө, маннык улахан таһымнаах күрэхтэһии диэтэххэ, кыттааччыта аҕыйах буолан баран, састаап өттүнэн ыллахха, тэҥ күүстээх бөҕөстөр мустубуттар. Ити бары ыйааһыннарга барыларыгар сыһыаннаах.

Лев Павлов сэрэбиэйгэ иккис бөлөххө түбэспит. Бастакы эргииргэ кини индус Рахулу кытта киирсэр. Онно хайалара кыайбыт салгыы, финал чиэппэригэр кыргыз Карачовка тахсар. Индус күүстээх бөҕөс, бэйэтин аатын биллэрбитэ син ыраатта. Кэнники Олимпиадаларга индиялар 57 киилэҕэ мэтээлгэ тиксибиттэриттэн (Рави Кумар – 2020, Аман – 2024) сылыктаатахха, Рахул мээнэ киһи буолбатах.

Бу бөлөххө финал аҥарыгар олохтоохтор саамай эрэнэр уоллара – былырыын Д.П. Коркин турнирыгар иккис миэстэлэммит Мунх-Эрдэнэ Батхуяг тахсара буолуо. Санатан эттэххэ, кини онно биһиги Лев Павловпытыгар хотторбута.

Оттон үөһэ бөлөххө кытаанах, тыҥааһыннаах киирсиилэр буолуохтара. Финалга тахсар иһин тустууларга Олимпиада призера Аман Сехрават (Индия), опыттаах бөҕөс Алмаз Сманбеков (Кыргызстан), соторутааҕыта Панамерика дойдуларын чемпионатыгар кыайбыт Роман Браво Янг (Мексика) киирсиэхтэрэ.

Лев Павлов бу, Россия хамаандатын састаабыгар киирэн кыраныысса таһыгар улахан дьоҥҥо бастакы кыттыыта диэххэ сөп.

61 киилэҕэ эмиэ уон киһи баар. Биһиги Георгий Окороковпыт, финал 8/1-гэр кыргыз Бекболот Мырназары кытта тустар.

Кыргызстар кэнники кэмҥэ тустууга сүрдээҕин тардыммыттарын билэ-көрө сылдьаҕыт. Оттон Георгий хайдах таһымҥа сылдьара эбитэ буолла? Быйыл кыһын А.Медведь турнирыгар үһүстүөҕүттэн ыла туста илик. Окороков бастакы утарсааччытын аастаҕына, салгыы эргииргэ индус Удиты кытта киирсиэҕэ, сеткаҕа көр.

Бу ыйааһыҥҥа күүстээхтэринэн көбүөр хаһаайына Туменбилег Тувшинтулга, Россияттан Артём Гобаев буолаллар. Ким бастыҥын дьэ көбүөр быһаарыа.

70 киилэҕэ 9 бөҕөс сэрэбиэйи ааспыт. Сэрэбиэй обургу хара бастакыттан Константин Капрыновы – аан дойду экс-чемпиона Загир Шахиевы кытта көрүһүннэрбит. Дагестанец 2021 сыллаахха 65 киилэҕэ Европа уонна аан дойду чемпиона буолуоҕуттан улахан көрдөрүүнү ситиһэ илик. Манна, Д.П. Коркин турнирыгар кэлэн ытыһын соттубут түгэннэрдээҕэ. Онон Россия сүүмэрдэммит хамаандатын аатыттан аан маҥнай сүрэхтэнэр Капрыновка, этэргэ дылы, мас-таас курдук эрэнэбит.

Капрынов-Шахиев киирсиилэрин кыайыылааҕа, финал чиэппэригэр Соҕуруу Корея бөҕөһүн кытта киирсиэҕэ. Бу ыйааһыҥҥа аллараа бөлөххө көрөргүт курдук, сүрүн киирсии олохтоохтор эрэллэрэ, Азия оонньууларын кыайыылааҕа, аан дойду чемпионатын призера Тумур-Очир Тулга уонна иранец Мохаммад Амузад Халили (Азия, аан дойду чемпиона, Олимпиада призера Рахман Амузад Халили игирэтин аҥаара) икки ардыларыгар буолара буолуо диэн сэрэйэбин.

Ханнык даҕаны түгэҥҥэ бэйэбит уолаттарбытыгар ситиһиилэри баҕарабыт.

Сарсын, ыам ыйын 31 күнүгэр көҥүл тустууга 74, 86 уонна 92 киилэлээхтэр күрэхтэһиини саҕалыыллар уонна киэһэ түмүктүүллэр. Хаалбыт сэттэ ыйааһыҥҥа хапсыһыылар, ол иһигэр биһиги уолаттарбыт тустуулара бэс ыйын 1 күнүгэр – өрөбүлгэ буолуохтара.

Тустуу суһал сонуннарын, видеолары, хаартыскалары «Дьулурҕан» телеграмҥа каналыгар t.me/dzulurgan көрө сылдьаргытыгар баҕарабыт.

Петр ПАВЛОВ.