Алиев турнира-2025: Ким кими кытта хайдах?

Дагестан Каспийскай куоратыгар албан аатырбыт Али Алиев кэриэһигэр көҥүл тустууга норуоттар икки ардыларынааҕы турнир түмүктэннэ. Саха сириттэн уон биир бөҕөс кытынна.

Түмүккэ Петр Копылов 57 киилэҕэ уонна Никита Хабаров ыарахан ыйааһыҥҥа үһүс бириистээх миэстэҕэ тахсан, боруонса мэтээлинэн наҕараадаланнылар. Любомир Ашеин (57 кг) түөртэ тустан бэһис миэстэлэннэ. Онон көрдөрүү куһаҕана суох диэххэ сөп. Икки мэтээл кэллэ.

Бу күрэхтэһии бөҕөстөрбүтүгэр, бэс ыйын бүтүүтэ Москваҕа ыытыллар Россия чемпионатыгар бэлэмнэнии биир түһүмэҕин быһыытынан көрүллэр. Онон билиҥҥи бэлэмнэрэ хайдаҕын сыаналаан, ырытан көрөргө тоҕоостоох буолла. Ылан көрдөххө, сорох тустууктарбыт ис кыахтарын өссө ситэ туһамматылар диэхпин баҕарабын. Ол курдук, Олег Фомин, Айсен Потапов уонна Станислав Свинобоев кыайан иһэн, хапсыһыы бүтэрэ аҕыйах сөкүүндэ хаалбытын кэннэ сыыһа-халты хамсанан, хобдохтук хотторон кэбистилэр. Петр Копылов даҕаны кыайар киһитигэр хотторон кэбистэ дии саныыбын. Чэ, икки мэтээл ситиһилиннэ. Сүрүнэ, көбүөргэ тахсан хапсыһыы ыыппыттара даҕаны, инники сыалларыгар-соруктарыгар, бэлэмнэригэр туһалаах буоларыгар баҕарыаҕыҥ.

Россия чемпионата чугаһаата. Аны анал үөрэтэр-эрчийэр түмсүүлэр ыытыллаллара хаалла. Хаһан баҕарар буоларыныы, тренердэр – буолан ааспыт түһүлгэ хапсыһыыларын, сыыһалары-халтылары үчүгэйдик ырытан, үөрэтэн – туоратыыга үлэлэһэллэригэр баҕарабыт. Ону тэҥэ, бастыҥнарбыт Лев Павлов уонна Константин Капрынов – Монголияҕа тустууларын кэтэһэбит. Тустууктарбытыгар Россия чемпионата – сыл саамай быһаарыылаах күрэхтэһиитэ буоларынан, болҕомто барыта онно ууруллуохтаах. Саха сирин хамаандатын кыттыытыгар туһулаан эттэххэ, билигин улаханы саҥарбакка, бүтэһиктээх сыанабыл ол чемпионат түмүгүнэн оҥоһуллуо. Оттон билигин, хаалбыт кэмҥэ, тренердэрбитигэр уонна тустууктарбытыгар ситиһиилээх үлэни эрэ баҕарабыт.

Алиев турнирыгар Саха сирин хамаандатын бөҕөстөрө ким кими кытта хайдах тустубутун мантан аллараа бэриллэр сыыппаралартан-чахчылартан көрүҥ уонна бэйэҕит сыаналааҥ.

Бөҕөстөрбүт тустуулара:

57 кг Федор Постников – Муса Мехтиханов (Дагестан) 3:4, Юнус Явбатиров (Дагестан) 0:10.

57 кг Петр Копылов – М.Абдраимов (Кыргызстан) +- быһа, Рахман Иманов (Азербайджан) 7:3, Магомед Газигандов (Москва) 5:6, Любомир Ашеин 3:1.

57 кг Любомир Ашеин – Валерий Андросов 11:0, Магомед Газигандов (Москва) 4:10, Магомед Мурадов (Дагестан) 15:7, Петр Копылов 1:3.

61 кг Валентин Бурнашев – Д.Гаирбеков (Москва) 4:16

61 кг Петр Константинов – Мунх-Эрдэнэ Батхуяг (Монголия) 0:3

70 кг Станислав Свинобоев – Константин Топшиноев (Иркутскай) 1:4

70 кг Олег Фомин – Берсан Галмакаев (Дагестан) 6:7

70 кг Айсен Потапов – Агаджи Магомедов (Дагестан) 12:5, Далгат Абдулкадыров (Дагестан) 4:4+

86 кг Андриан Ленский – Адам Магомедханов (ЯНАО) 6:3, Дибир Магомедов (Дагестан) 1:2

125 кг Никита Хабаров – Абдулла Курбанов (Дагестан) 2:5, Александр Гришин (Воронеж) +1:1, Сайд-Хасан Ахматов (Дагестан) 3:0.

Петр ПАВЛОВ.