Саахыматчыт Цзюй Вэньцзюнь – эмиэ кыайыылаах

Бу күннэргэ дьахталларга аан дойдуга бастыыр иһин матч ыытыллан түмүктэннэ. 2023 сыллаахха курдук, эмиэ Кытай икки бастыҥ оонньооччулара, аан дойду 17-с чөмпүйүөнэ Цзюй Вэньцзюнь уонна аан дойду 16-с чөмпүйүөнэ Тань Чжунъи көрүстүлэр.

Барыта 12 партия Шанхайга уонна Чунцин куораттарга оонньонуохтааҕа эрээри, тоҕус тур кэнниттэн 6,5:2,5 ахсаанынан Цзюй лаппа кыахтаахтык атан кыайыыны эрдэ сурунна. Тоҕус турга биэстэ баһыйда, үстэ тэҥнэстэ, биирдэ хоттордо. Цзюй оонньуу саҕаланыытыттан (дебют) бүтүөр диэри (миттешпиль, эндшпиль) таһыччы үрдүк бэлэмнээҕин көрдөрдө диэн үгүстүк бэлиэтэннэ. Уопсай бириистэрэ 500 тыһ. евро. Онтон кыайыылаахха 60%, бииригэр 40% тиксиэхтээх.

Цзюй Вэньцзюнь – 34 саастаах. 2018 с. Тань Чжуньины хотон саахымат хоруонатын кэппитэ. 2020 с. Александра Горячкинаны (Арассыыйа), 2023 Лэй Тинцзены (КНР) кыайталаан аан дойдуга бастыҥ буоларын бигэргэппитэ. Манна барытыгар эрбии биитин курдук тэҥ оонньууга кыранан чорбойбута.

Тань Чжунъи – 33 саастаах. 2017 с. Ираҥҥа аан дойду 16-с чөмпүйүөнэ ааты ылбыта. 2018 с. тэҥ хатыһыылаах оонньууга Цзюй Вэньцзюнь кинини баһыйбыта. 2024 с. муус устар ыйыгар Канада Торонто куоратыгар аан дойду 8 саамай күүстээх саахыматчыттарыттан (турнир претенденток) 14 очукуоттан 9 ылан таһыччы ырааҕынан инники тахсыбыта, быйылгы матч оонньуур быраабы ылбыта.

Кытай кыргыттарыттан Се Цзюнь 1991 с. Майя Чибурданидзены (Грузия) кыайан аан дойдуну барытын соһуппута, «Китайское нашествие» дэммитэ. Ол иннинэ 30-ча сыл тухары ССРС-тан күннээх Грузия кыргыттара Нона Гаприндашвили 1962-78 сс., Майя Чибурданидзе 1978-91 сс. баһылаан-көһүлээн, кыайан-хотон кэлбиттэрэ.

Билигин Цзюй Вэньцзюнь, Тань Чжунъи сэргэ Хоу Ифань, Лэй Тинцзе, Чжу Цзинэрь уо.д.а. олус күүстээх оонньооччулардаах Улуу Кытай чугаһынааҕы кэмнэргэ иннин биэрэр санаата суох быһыылаах.

2024 сыл ортотуттан «Гран-при ФИДЕ» диэн ааттаах-суоллаах турнирдар (турнир претенденток) саҕаламмыттара. Бу күннэргэ Индияҕа бэһис түһүмэҕэ бара турар. Уустук эриири-мускууру ааһан эмиэ аҕыс буолан талыллан оонньуохтара. Арассыыйаттан Александра Горячкина, Екатерина Лагно, Полина Шувалова утум-ситим тахсыылаахтык оонньуу сылдьаллар.

Степан Андреев, Майа.