Сүбэлэр, бэлиэтээһиннэр, ырытыылар

Өр сыллар тухары үлэлээбит баай опытын түмэн Константинов Николай Николаевич иккис кинигэтин түмүктээбит. Бу кинигэтигэр Саха сирин, Россия уонна Аан дойду таһымҥарыгар тустубут урукку аатырбыт бөҕөстөрбүт уонна кинилэри бэлэмнээбит тренердэрбит, салайааччыларбыт, айымньылаахтык үлэлээбит кэмнэриттэн бэйэтин көрүүлэрин, ол чэрчитинэн үөскээбит ситим санааларын, көмө курдук буоллун диэн сэмсэ сүбэ түмпүт.

Ааҕааччы көҥүл тустуу Саха сиригэр сайдыытын бастакы хардыыларыттан саҕалаан табыгастаахтык түһүмэхтэринэн суруллубутун ааҕан тус бэйэтин сайдыытыгар туһаныа. Ол курдук: тустуу сайдыытын историятыттан кылгастык; Сахабыт сиригэр тустуу сайдыытын чахчыларыттан; кинилэр бастакылар  этилэр; түмүк туһалааҕын, көрөр киһи; тустуу тула бэлиэтээһиннэр, этиилэр, санаалар, көрдөөһүннэр, ырытыылар, арыйыылар; ахтыылартан быһа тардыылар; ситим санаалар; ааспыт дьыллары эргитэ көрөн. Ону тэҥэ нууччалыы түһүмэххэ «Понятие о профессиональном спорте» үрдук таһымҥа тустуон баҕалаах спортсменнарга анаммыт 5 хардыы суруллан анаммыт.

Константинов Николай Николаевич сэмсэ сүбэлэрэ, ситимнээх санаалара кинигэ буолан күн сирин көрбүтүнэн эҕэрдэлиибит. Сахалыы, нууччалыы тылларынан суруллубута элбэх ааҕааччыны хабар туруктаах.

Кинигэ чуолаан көҥүл тустууну, спорду сэҥээрээччилэргэ анаммыт уонна кинилэргэ үлэлэригэр чопчу туһалаах буолар.

ТОРГОВКИН Владимир Гаврильевич, XXVI Олимпийскай оонньуулар көҥүл тустууга кыттыылааҕа, педагогическэй билим кандидата, доцент.