Остуолга ууруна сылдьан үөрэтэллэригэр баҕарабын

Олох соторутааҕыта курдук этэ дии, 2019 сыллаахха Николай Николаевич Константинов «Тустуук ис туругун бөҕөргөтүү» диэн, тренердэргэ, тустууктарга, тустууну сэҥээрээччилэргэ анаан бөҕөс, ис санаа кытаанах бигэ туругун иитиигэ, бэйэ туругун салайыыга бэйэтин баай үөрүйэҕин туһанан сүбэлиир-амалыыр хайысхалаах, санаатын атастаһар кинигэтэ бэчээттэнэн тахсыбыта. Онно суруналыыс быһыытынан бэйэм санаабынан эмиэ кыттыспытым.

Оттон былырыын, Николай Николаевич иккис кинигэбин бэлэмнии сылдьабын диэн сэргэхсиппитэ. Кини бэйэтэ улуу тренер Д.П. Коркин иитиллээччитэ, көҥүл тустууга ССРС спордун маастара, Саха АССР үтүөлээх тренерэ, олоҕун тустууга анаабыт киһи буоларынан, куруук чинчийэр, көрдүүр, үөрэтэр аакка сылдьар. Онон бу, саха тустуута сайдарыгар туһуламмыт иккис кинигэтэ буолар. Ол барыта, кини бэйэтин опытын ыччаттарга, эдэр тренердэргэ үллэстиэн баҕарар санаатыттан тахсар. Үтүө быһыы диэххэ сөп. Кинини ким да маннык дьайыыга күөттээбэтэх буолуохтаах, барыта бэйэтин ис санаатыттан…

Бу да кинигэ – методическай хабааннаах. Манна элбэх ырытыылар, тэҥнээн көрүүлэр, таблицалар, схемалар, сүбэлэр-амалар киирдилэр. Кинигэҕэ тустуу, спорт элбэх биллиилээх специалистара, аатырбыт спортсменнар бэйэлэринэн кыттыспыттара үөрүүлээх, биир киһи санаатын ситэрэн-хоторон биэрэллэр диэххэ сөп. Билэргит курдук, Саха сиригэр тустуу, тустууктар тустарынан кинигэлэр син бэчээттэнэллэр. Ол гынан баран, маннык үөрэтэр, сүбэлиир, методическай ис хоһоонноох кинигэлэр аҕыйахтар. Манан, бу хайысхаҕа үлэлиир Николай Николаевич Константиновка махтаныах эрэ кэриҥнээхпит. Уонна кини бу үлэтин ССРС, РСФСР, Саха АССР үтүөлээх тренерэ, Саха сирин үтүөлээх учуутала, биһиги бары ытыктыыр киһибит Дмитрий Петрович Коркин саҕалаабыт дьыалатыгар сыһыаран оҥордо диэн сэрэйиэххэ сөп.

Мин саамай баҕарарым диэн, бу кинигэни – тустуу эдэр тренердэрэ уонна тустууктар, этэргэ дылы, олох, күннэтэ остуолларыгар ууруна сылдьан ааҕар, ырытар, үөрэтэр кинигэлэрэ буоларыгар. Киһи элбэҕи ааҕан, билэн-көрөн сайдар. Ити биирэ.

Иккиһинэн, тус санаа быһыытынан эттэххэ, ааптар Н.Н. Константинов – Р.М. Дмитриев аатынан Олимпийскай эрэл училищетын иһинэн Спортивнай албан аат түмэлин салайааччыта буоларынан, бу кинигэни ырытыы күннэрин, кылаас чаастарын ыытара буоллар. Эбэтэр, өссө аһара баран эттэххэ, бу методиканан биир эмэ эдэр тренер ылсан үлэлиирэ буоллар. Биир тылынан, кинигэ бэчээттэнэн тахсан баран, бастаан-утаа арыллан көрөөт, ууруллан хаалбакка быыллыйа сытыа суохтаах, үлэлиэхтээх!

Сарсын, муус устар 2 күнүгэр күнүс 14:15 чаастан Р.М. Дмитриев аатынан Олимпийскай эрэл училищетын (Дьокуускай, Жорницкай уул. 13) мунньахтыыр саалатыгар «Сэмсэ сүбэлэр, ситимнээх санаалар» диэн Н.Н. Константинов саҥа кинигэтин сүрэхтэниитэ буолар. Онно тустуу куттаах дьону барыгытын ыҥырабыт.    

Петр ПАВЛОВ.