«Хоро Бэргэн» күрэхтэһиититтэн кыайыы көтөллөнөн

Муус устар 12-13 күннэригэр Уус Алдан Бороҕонугар Н.Н. Тарскай аатынан Спорт дыбарыаска төрүт оҕунан ыытыыга «Байанай бэлэҕэ» көрүҥҥэ 5-с төгүлүн ыытыллар «Хоро Бэргэн-2025» күрэхтэһиигэ республика араас муннуктарыттан 300-чэкэ охчуту түмүстэ.

Таатта улууһун хамаандата 40 охчуттаах, үрдүк таһымнаахтык кыттан, кыайыы көтөллөнөн кэллибит.

Дьахталларга 96 кыттааччы. Макарова Ньургуяна “Куһу” ытыыга 1-кы, “Тииҥи” ытыыга 3-с миэстэ буолла. Онон үс көрүҥ түмүгүнэн иккис миэстэлэннэ.

Эр дьоҥҥо 81 кыттааччы күрэхтэстэ. Манна Иван Беляев “Тииҥҥэ” 2-с миэстэ. Оттон Прокопий Моттуев – “Куобахха” уонна “Куска” иккис, “Тииҥи” ытыыга бастакы миэстэлэри ылла. Онон кини үс көрүҥ түмүгүнэн 1-кы миэстэ буолла.

Бэтэрээн дьахталларга 58 кыттааччы күрэс былдьаста. Марфа Васильева “Куобаҕы” ытыыга 1-кы, “Тииҥи” ытыыга 2-с көрдөрүүлэннэ. Үс көрүҥ түмүгүнэн Марфа иккис миэстэни ылла.

Бэтэрээн эр дьоҥҥо 38 кыттааччыттан Симон Дедюкин Тииҥҥэ 1-кы миэстэни ылла.

Маны таһынан Марфа Васильева үс көрүҥ түмүгүнэн 77 очкону ылан, төрүт оҕунан ытыыга Саха сирин маастарын нуорматын толордо. Санатар эбит буоллахха, кини Таатта улууһугар төрүт оҕунан ытыыга 5-с маастарынан бэйэтин аатын киллэрдэ. Уонна “Сахаада” спордун маастара Леонид Степанович Васильев баар.

Хамаанданан ытыыга 12 улуус киирдэ, ол эбэтэр, күрэхтэһии балаһыанньатынан улуустартан улуус аҕа баһылыга, эбэтэр солбуйааччыта, улуус мунньаҕын дьокутааттарын бэрэсэдээтэлэ, дьокутаата, нэһилиэк аҕа баһылыга хамаандаҕа кыттааччы быһыытынан баһылыктар бөлөхтөрүгэр киирбит эрэ буоллахтарына хамаандаҕа киирэн ытар бырааптанаҕын.

Биһиги хамаандабыт састааба: Октябрьскай нэһилиэк аҕа баһылыга Семенов Андрей Петрович, Ньургуяна Макарова, Прокопий Моттуев, Марфа Васильева, Леонид Васильев киирэннэр сүрдээх тыҥааһыннаах киирсиигэ Чемпион үрдүк аатын сүктүбүт.

1 миэстэ – Таатта, 2 миэстэ – Хаҥалас, 3 миэстэ – Бүлүү.

Кыһыҥҥы кэмҥэ биир улахан эппиэттээх күрэспит этэҥҥэ кыайыылаах-хотуулаах түмүктэммитинэн бука барыгытыгар эҕэрдэ!

Таатта оҕунан ытыыга федерацията.