Гаврил Текеянов кэриэһигэр

Бу өрөбүллэргэ Бэрдьигэстээххэ олорон эрэ волейболга горнайдар биир чаҕылхай ыччаппыт, спорт бу көрүҥэр Арассыыйа призера Гаврил Текеянов сырдык аатыгар өрөспүүбүлүкэтээҕи күрэхтэһии ыытылынна.

Бастыҥ ааты эр дьоҥҥо алта, кэрэ аҥардарга сэттэ хамаанда былдьаста.

Спортсменнар бары олус бэлэмнээх кэлэн, кыраһыабай тыҥааһыннаах оонньууну көрдөрдүлэр.  Успуорт үтүөлээх маастара Алена Дмитриева бэйэтин оонньуутунан хамаандатын көҕүлүүрүн астына бэлиэтиэххэ сөп. Атын да хамаандаларга спорт маастардара төһүү күүс буоланнар, инники күөҥҥэ тахсыахтарын таҕыстылар.

Икки күннээх сытыы киирсиилэр кэннилэриттэн кэрэ аҥардарга Нам бастакы, Сунтаар иккис, Чурапчы үһүс миэстэ буолла.

Эр дьоҥҥо – Амма бастакы, Үөһээ Бүлүү иккис, Дьокуускай үһүс миэстэни ылла.

Кыайыылаахтарга, бастыҥ оонньооччуларга сүрүн бириистэри таһынан Гаврил Текеянов дьиэ кэргэнэ, чугас дьоно-сэргэтэ, уруулара-аймахтара, доҕотторо, биир дойдулаахтара, бииргэ үлэлээбит Ис дьыала отделын сотрудниктара, спонсордар олохтообут сыаналаах бириистэринэн наҕараадаланнылар.

Күрэхтэһии кылаабынай судьуйата, СӨ сүүмэрдэммит хамаандатын тириэньэрэ Константин Гаврильев горнайдар доруобуйаларын хааччахтаах дьон спордун өйөөн, усулуобуйа олохтоон, чөмпүйэнээт бэркэ барда, улахан көмөнү оҥордулар диэн махтанна. Өссө сүбэлэһэн, Бэрдьигэстээххэ Саха сирин сүрүн хамаандата сүүмэрдиир дьарыктары ааһарын үөрэтэн көрүөххэ баар этэ диэн баҕа санаалаах.

Маннык улахан күрэхтэһии үрдүк таһымҥа ыытылларыгар улуус, Одуну нэһилиэгин салалтата улахан болҕомто ууран, биир дойдулаахтарын аатын үйэтитэн, Ил Дархан Гранын ылары ситиһэн, спонсордар итэҕэллэрин ылан – спорт бырааһынньыгын бэлэхтээбитэ хайҕаллаах, махталлаах дьыала буолар.

Вячеслав АЛЕКСЕЕВ. Горнай – Бэрдьигэстээх.

Ааптар хаартыскаҕа түһэриитэ.